సంగాపూర్​.. సింగపూర్​గా మారుతుంది: హరీశ్​రావు

మల్లన్నసాగర్​ జలాశయం నిర్వాసితులకు ఇచ్చినట్లుగానే కొండపోచమ్మ నిర్వాసితులకు పరిహారం చెల్లిస్తామని రాష్ట్ర ఆర్థిక మంత్రి హరీశ్​రావు హామీ ఇచ్చారు. గజ్వేల్ పట్టణ శివారులోని సంగాపూర్​లోని రెండు పడక గదుల ఇళ్లల్లో తాత్కాలికంగా నివాసం ఉంటున్న తోగుట మండలం లక్ష్మాపూర్ గ్రామస్తులు దుబ్బాక ఉప ఎన్నికల్లో తెరాసకు మద్దతు తెలుపుతున్నట్లు ఏకగ్రీవ తీర్మానాన్ని అందించే కార్యక్రమానికి మంత్రి హాజరయ్యారు.

మల్లన్న సాగర్ భూనిర్వాసితుల త్యాగం వెలకట్టలేనిదని.. మంత్రి హరీశ్​రావు అన్నారు. వారిని గుండెల్లో పెట్టి చూసుకుంటామని హామీ ఇచ్చారు. కొండపోచమ్మ జలాశయం భూ నిర్వాసితులకు ఇచ్చినట్లుగానే ప్యాకేజీ ఇస్తామన్నారు.

గజ్వేల్ పట్టణ శివారులోని సంగాపూర్​లోని రెండు పడక గదుల ఇళ్లల్లో తాత్కాలిక నివాసం ఉంటున్న తోగుట మండలం లక్ష్మాపూర్ గ్రామస్తులు దుబ్బాక ఉప ఎన్నికల్లో తెరాసకు మద్దతు తెలుపుతున్నట్లు ఏకగ్రీవ తీర్మానాన్ని మంత్రికి అందజేశారు.

మల్లన్న సాగర్​.. నిర్వాసితుల త్యాగం వల్లనే నేడు 5 లక్షల ఎకరాలకు సాగునీరు అందుతోంది. అప్పట్లో ప్రాజెక్టు నిర్మాణానికి భూములిచ్చారు. ఇప్పుడు తెరాసకు మద్దతు పలికేందుకు ముందుకొచ్చారు. మీ అభిమానాన్ని ఎప్పటికీ మరిచిపోలేను. ప్రభుత్వ పరంగా అందాల్సిన పరిహారాన్ని అందిస్తాం.

- హరీశ్​రావు, రాష్ట్ర ఆర్థికమంత్రి

గజ్వేల్-ప్రజ్ఞాపూర్ మున్సిపాలిటీ పరిధిలో నిర్మిస్తున్న పునరావాస కాలనీ పక్కనే కంపెనీలను ఏర్పాటు చేయించి నిర్వాసిత గ్రామస్తులందరికీ ఉపాధి అవకాశాలు కల్పించేలా చర్యలు తీసుకుంటామని హరీశ్​రావు తెలిపారు. ప్రస్తుతం ఇక్కడున్న సంగాపూర్​.. సింగపూర్​గా మారుతుందన్నారు.

ఈ కార్యక్రమంలో మెదక్ ఎంపీ కొత్త ప్రభాకర్ రెడ్డి, రాష్ట్ర అటవీ అభివృద్ధి సంస్థ కార్పొరేషన్ ఛైర్మన్​ వంటేరు ప్రతాపరెడ్డి, డీసీసీబీ ఛైర్మన్​ చిట్టి దేవేందర్​రెడ్డి, ఇతర నేతలు పాల్గొన్నారు.

ఇవీచూడండి:రాహుల్​గాంధీ.. భాజపాపై పోరాడమంటే.. ఇక్కడ మాత్రం..: హరీశ్​