Covid 19 Tracker website: 'కొవిడ్‌ 19 ట్రాకర్‌ వెబ్​సైట్​.. ఒక్క క్లిక్‌తో సమస్త సమాచారం'

Covid 19 Tracker website: దేశంలో కరోనా వైరస్ వ్యాప్తి మొదలైనప్పటి నుంచి ఐఐటీ హైదరాబాద్ నియంత్రణపై పరిశోధనలు ప్రారంభించింది. కరోనా చికిత్సతో పాటు అరికట్టే మార్గాలపై విస్తృత స్థాయిలో అన్వేషణ సాగిస్తోంది. ఇప్పటికే అత్యంత కచ్చితమైన ఫలితం ఇచ్చే చౌకైన టెస్టు కిట్లు, అతి తక్కువ ఖర్చుతో వెంటిలేటర్లు, నానో సాంకేతికతతో శానిటైజర్లు తయారు చేశారు. తాజాగా కరోనాకు సంబంధించి దేశ వ్యాప్తంగా ఉన్న పూర్తి సమాచారం అందించేలా కొవిడ్19ట్రాకర్.ఇన్ పేరుతో ఓ వెబ్ సైట్ రూపొందించారు. ఇందులోని సమాచారం సాధరణ ప్రజలకే కాకుండా పరిశోధకులకు సైతం కీలకంగా ఉపయోగపడనుంది. ఈ వెబ్ సైట్ ప్రత్యేకతలు, రూపకల్పన చేయాలన్న ఆలోచనకు గల కారణాలు వంటి అంశాలపై ఐఐటీ హైదరాబాద్ డైరెక్టర్‌ బీఎస్ మూర్తితో మా ప్రతినిధి క్రాంతికుమార్ ముఖాముఖి.

• ఈటీవీ భారత్​ ప్రతినిధి: కొవిడ్ 19 ట్రాకర్. ఇన్ ప్రత్యేకతలు ఏంటి.?

బీఎస్​ మూర్తి: ఈ కొవిడ్ 19 ట్రాకర్ దేశ వ్యాప్తంగా ఉన్న సమాచారాన్ని సేకరించి క్రోడికరిస్తుంది. కేవలం ఒక్క క్లిక్​తో కరోనా కేసులు, నిర్ధరణ పరీక్షలు, వ్యాక్సినేషన్ వంటి పూర్తి సమాచారం, భవిష్యత్ అంచనాలు, ముందస్తు సూచనలు వంటివి ఈ వెబ్ సైట్​లో తెలుసుకోవచ్చు. దీంతో పాటు కీలకమైన సమాచారాన్ని పది ప్రాంతీయ భాషల్లో అందుబాటులో ఉంచుతున్నాం.

• కొవిడ్ 19 ట్రాకర్. ఇన్ వెబ్​సైట్​ ఏర్పాటు చేయాలన్న ఆలోచన ఎలా వచ్చింది.?

-గతంలో కొవిడ్19ఇండియా.ఆర్గ్ అనే వెబ్​సైట్​ను కొంతమంది యువకులు నిర్వహించేవారు. కరోనా ప్రారంభం నుంచి దేశవ్యాప్తంగా ఉన్న సమాచారాన్ని సేకరించి ఈ వెబ్​సైట్ ద్వారా అందించే వారు. ఈ సమాచారం ఆధారంగానే దేశంలో కరోనా అంచనాలతో పాటు పరిశోధనలు కూడా జరిగేవి. కానీ నవంబర్ నుంచి ఈ సేవలు నిలిపివేస్తున్నట్లు వారు ఆగస్టులో ప్రకటించారు. ఈ విషయం తెలిసిన వెంటనే కరోనా పూర్తి సమాచారంతో మేమే ఓ వెబ్​సైట్ నిర్వహించాలని నిర్ణయించుకున్నాం. ఐఐటీ హెచ్​లోని కంప్యూటర్ సెంటర్ ఆధ్వర్యంలో యుద్ధ ప్రాతిపదికన కేవలం నెల రోజుల్లోనే కొవిడ్19ట్రాకర్.ఇన్ వెబ్​సైట్ రూపొందించాం.

• ఎప్పటికప్పుడు దేశ వ్యాప్త సమాచారాన్ని సేకరించడం ప్రభుత్వ విభాగాలకే కష్టతరం. మరి మీరు సమాచారాన్ని ఎలా సేకరిస్తున్నారు.?

- ప్రతి రాష్ట్రం వారి పరిధిలోని కరోనా సమాచారాన్ని ప్రతిరోజు వివిధ మార్గాల ద్వారా విడుదల చేస్తోంది. మా బృందం ఈ సమాచారాన్ని ఎప్పటికప్పుడు సేకరించి.. వెబ్​సైట్​లో పొందుపరుస్తుంది. ప్రభుత్వం అధికారికంగా ఇచ్చిన సమాచారం మాత్రమే ఇందులో ఉంటుంది.

• వెబ్​సైట్ నిర్వహణలో ఎంత మంది నిమగ్నమయ్యారు. వారి ప్రత్యేకతలు ఏంటి.?

-ప్రముఖ శాస్తవేత్త, సూత్ర కన్సోసీయం సభ్యులు ఆచార్య విద్యాసాగర్, ఐఐటీ హెచ్ కంప్యూటర్ సెంటర్ భీమార్జన రెడ్డి ఈ ప్రాజెక్టులో కీలకంగా వ్యవహరిస్తున్నారు. వీరితో పాటు కంప్యూటర్ సైన్స్ విభాగానికి చెందిన ఆచార్యులు, విద్యార్థులు సైతం పాలు పంచుకుంటున్నారు.

• కొవిడ్​19ట్రాకర్. ఇన్ నిర్వహణలో సూత్ర మోడల్​ను వినియోగిస్తున్నారు. ఈ సూత్ర మోడల్ అంటే ఏంటి.?

- సూత్ర మోడల్​లో కృత్రిమ మేథలోని అత్యాధునిక సాంకేతికతను వినియోగించుకుని సమాచారాన్ని విశ్లేషిస్తారు. ప్రస్తుతం ఉన్న సమాచారంతో భవిష్యత్తు ఎలా ఉంటుందో అంచనా వేయడం దీని ప్రత్యేకత. ప్రస్తుతం అందుబాటులో ఉన్న మోడల్స్​లో ఇది అత్యుత్తమమైందని ప్రభుత్వం గుర్తించింది.

• దేశంలోకి కొవిడ్ అడుగు పెట్టినప్పటి నుంచి దీనిని ఎదుర్కొనేలా ఐఐటీ హైదరాబాద్ పరిశోధకులు అనేక పరిశోధనలు చేస్తున్నారు. ప్రస్తుతం ఏ ప్రాజెక్టులు కీలక దశలో ఉన్నాయి.?

- టెస్ట్ కిట్లు, వెంటిలేటర్ తుది దశ క్లినికల్ ట్రయల్స్ కూడా పూర్తయ్యాయి. త్వరలో ప్రజలకు అందుబాటులోకి రానున్నాయి. వివిధ రకాల వ్యాక్సిన్లు, ఔషధాల మీద పరిశోధనలు జరుగుతున్నాయి.

• ప్రస్తుతం ప్రపంచవ్యాప్తంగా ఒమిక్రాన్ వేరియంట్​పై చర్చ జరుగుతోంది. దీనిపై ఐఐటీ హైదరాబాద్​లో ఎలాంటి పరిశోధనలు చేస్తున్నారు.?

- ఐఐటీలోని కొంతమంది ఆచార్యులు ఒమిక్రాన్​పై పరిశోధన చేస్తున్నారు. భవిష్యత్తులో దేశంలో దీని వ్యాప్తి ఎలా ఉంటుంది అన్న కోణంలో అంచనాలు రూపొందిస్తున్నారు. అత్యంత క్లిష్ట పరిస్థితులు ఎలా ఉంటాయో అంచనా వేస్తున్నారు. ప్రస్తుత అంచనాల ప్రకారం ఒమిక్రాన్ వేరియంట్ ప్రమాదకరం కాదన్న నిర్ధరణకు వచ్చాం. ఈ వేరియంట్​ ప్రజలెవరూ భయపడాల్సిన అవసరం లేదని సూచిస్తున్నాం.

ఇదీ చదవండి:Omicron Variant News : వ్యాప్తిలో ఒమిక్రాన్ వేగం.. వ్యాక్సిన్‌తో దూరం