ఫీజుల కోసం పరీక్షల నిర్వహణ... తీవ్రంగా పరిగణించిన అధికారులు

కరోనా సెకండ్ వేవ్ వేగంగా విస్తరిస్తోంది. గాలి ద్వారా కూడా వ్యాపించే దశకు చేరుకుందని... రాష్ట్ర ప్రభుత్వం హెచ్చరిస్తున్నా.. విద్యార్థుల ప్రాణాలను పణంగా పెట్టి ఫీజుల కోసం పరీక్షలు నిర్వహించారు. పేపర్​తో పాటు ఫీజులు కూడా తీసుకురావాలని ఓ పాఠశాల చెప్పగా విద్యాధికారులు తీవ్రంగా స్పందించారు.

సంగారెడ్డి జిల్లా పటాన్​చెరులో కరోనా నిబంధనలు బేఖాతరు చేసి ఫీజుల కోసం పరీక్షలు నిర్వహించిన సెయింట్ జోసఫ్ ఉన్నత పాఠశాల యాజమాన్యానికి జిల్లా విద్యాధికారి నోటీసులు ఇచ్చారు. ఆన్​లైన్​ ద్వారా పేపర్ పంపి ఇంటివద్దే పరీక్షలు నిర్వహించి పేపర్​ పాఠశాలకు తీసుకురావాలని స్కూల్ యాజమాన్యం విద్యార్థులకు తెలియజేసింది.

రెండు రోజులుగా విద్యార్థులు ఇంటి వద్ద రాసి పేపర్లు తీసుకొని పాఠశాలకు గుంపులుగుంపులుగా వెళ్లారు. కరోనా నిబంధనలు గాలికొదిలేసిన యాజమాన్యం పట్ల విమర్శలు వెల్లువెత్తుతున్నాయి.

పరీక్షల పేరుతో ఫీజులు వసూలు చేస్తూ కొవిడ్ నిబంధనలు పాటించకుండా పిల్లల భవిష్యత్​ను ప్రశ్నార్థకంలోకి నెట్టేస్తున్నారని విద్యార్థుల తల్లిదండ్రులు ఆందోళన వ్యక్తం చేస్తున్నారు. పరీక్షల నిర్వహణపై జిల్లా విద్యాధికారి రాజేశ్​కు తల్లిదండ్రుల నుంచి ఫిర్యాదు అందగా మండల విద్యాధికారిని పాఠశాలకు పంపి పరిశీలించారు. డీఈఓ ఆదేశాల మేరకు పాఠశాల యాజమాన్యానికి నోటీసులు ఇచ్చారు.

ఇదీ చదవండి:'పబ్​లు, మద్యం దుకాణాలే ముఖ్యమా? ప్రజల ప్రాణాలు కాదా'