అమ్మ జన్మనిస్తుంది.. అలాంటి కన్నతల్లికి పునర్జన్మనిచ్చారు ఈ కుమార్తెలు. రోడ్డు ప్రమాదంలో అచేతనంగా మారిన తల్లిని.. అహర్నిషలు శ్రమించి మామూలు స్థితికి తీసుకొచ్చారు. తల్లి లేని జీవితాన్ని ఊహించుకోలేమని చదువులు పక్కనబెట్టి ఏడాదిపాటు సపర్యలు చేశారు. తన బిడ్డలే తల్లిగా మారి చేసిన సేవలతో కోలుకున్న మాతృమూర్తి... ఇప్పుడు తన బిడ్డలను చూసి గర్విస్తోంది.
సంగారెడ్డి పట్టాణానికి చెందిన రహేలకు ఇద్దరు కుమార్తెలు. అనూష, వరమ్మలు పుట్టిన కొన్నాళ్లకే భర్త కుటుంబాన్ని వదిలి వెళ్లిపోయాడు. మిషన్ కుడుతూ పిల్లల్ని బాగా చదివించాలని రహేల తపనపడేది. గతేడాది అక్టోబర్‌ 21న ద్విచక్ర వాహనంపై కూతుర్ని కళాశాలలో దింపి వస్తుండగా... రోడ్డు ప్రమాదంలో రహేల అచేతనంగా మారింది. తల్లిని మళ్లీ మామూలు మనిషిగా చూడాలని కూతుళ్లిద్దరూ ఎంతగానో ప్రయత్నించారు. డబ్బుల్లేక నానా అవస్థలు పడ్డారు. వారి ఆవేదనను ఈటీవీ - ఈటీవీ భారత్ అందరికీ తెలియజేసింది. మంత్రి హరీశ్‌రావు స్పందించి రహేలకు మెరుగైన వైద్యం అందేలా చొరవ తీసుకున్నారు. తల్లి మామూలు మనిషిగా మారితే చాలని కూతుళ్లిద్దరూ చంటిబిడ్డలా కాపాడుకున్నారు. అన్నం తినలేని స్థితిలో ముక్కు ద్వారా ద్రవ పదార్థాలు అందించారు. ఏడాది శ్రమతో అమ్మకు మరోజన్మను ప్రసాదించారు.
ఇటీవల పూర్తిగా కోలుకున్న రహేలా తన బిడ్డల్ని చూసి గర్విస్తోంది. కూతుళ్లు పడిన ఆవేదన, కష్టాన్ని గుర్తుచేస్తే రహేల కళ్లు పుత్రికోత్సాహంతో వర్షిస్తున్నాయి. కష్టపడి వారిని మంచి చదువులు చదివిస్తానని గర్వంగా చెబుతోంది. అమ్మకే అమ్మలై మాతృమూర్తికి పునర్జన్మనిచ్చి... కంటే కూతుర్నే కనాలి అన్న మాటను నిజం చేసిన అనూష,వ రమ్మలను ప్రతి ఒక్కరూ ప్రశంసిస్తున్నారు.
