గూగుల్​ పేతో ఖాతా ఖాళీ..అడ్డంగా దొరికిన కేడీ..

ఒకే గ్రామానికి చెందిన వాడని నమ్మితే మోసం చేశాడు. మగతోడులేని ఆ మహిళను మాయమాటలతో ఏమార్చాడు. గూగుల్​పే సహాయంతో మూడో కంటికి తెలియకుండా డబ్బు కొల్లగొట్టాడు. కానీ సీన్​ రివర్స్​ అయ్యి ఊచలు లెక్కిస్తున్నాడు.

సంగారెడ్డి జిల్లా కంగ్టి మండలంలోని నాగూర్ గ్రామానికి చెందిన శాంతమ్మకు కంగ్టిలోని ఏపీజీవీబీ బ్యాంకులో ఖాతా ఉంది. భర్త చనిపోగా వచ్చిన రూ.5 లక్షల బీమా డబ్బులు, కూతురు వివాహానికి వచ్చిన కళ్యాణలక్ష్మి చెక్కును బ్యాంకు ఖాతాలో జమ చేసింది.
ఇదిలా ఉండగా అదే గ్రామానికి చెందిన తుకారం ఆమెకు మాయమాటలు చెప్పి ఆధార్ కార్డు, బ్యాంకు పాస్ పుస్తకం నకలు ప్రతులను తీసుకున్నాడు. వాటి ద్వారా ఆమె ఖాతాలో ఉన్న డబ్బులను కాజేయాలని పథకం పన్నాడు.

గూగుల్​ పేతోనే స్వాహా చేశాడు..
అదే ఊరికి చెందిన రాజు ఇటీవల చరవాణిని పోగొట్టుకోవడం.. అది తుకారాంకు దొరికడం వల్ల అతను చేయాలనుకున్న పని మరింత సులువైంది. చరవాణిలోని సిమ్​ను వేరొక సెల్​లో వేసి గూగుల్​ పే డౌన్​లో చేసుకున్నాడు.
మరో మహిళను శాంతమ్మ అంటూ బ్యాంకు అధికారులకు చూపించాడు. బ్యాంకు అకౌంటుకు కొత్త ఫోన్ నెంబర్​ లింక్​ చేయాలని అధికారులను కోరాడు. దీనితో ఆమె ఖాతాలోని డబ్బులు రెండు నెలల్లో రూ. 2 లక్షల 50 వేల రూపాయలు ఖాళీ చేశాడు.

కథ అడ్డం తిరిగింది
ఇంతలో శాంతమ్మకు డబ్బులు అవసరం ఉండటం వల్ల బ్యాంకుకు వెళ్లి పరిశీలించగా రూ. 2 లక్షల 50 వేలు డ్రా చేశారని బ్యాంకు అధికారులు చెప్పడంతో ఆమె విస్తుపోయింది. దీనితో శాంతమ్మ పోలీసులకు ఫిర్యాదు చేసింది. కేసు నమోదు చేసుకున్న పోలీసులు విచారణ జరుపగా తుకారం నేరానికి పాల్పడినట్లు రుజువైంది.

నిందితుడిని అరెస్ట్ చేసి అతని దగ్గర నుంచి రూ. 2 లక్షల 50 వేలు స్వాధీనం చేసుకుని రిమాండ్​కు పంపామని సీఐ వెంకటేశ్వరరావు తెలిపారు.

ఇదీ చూడండి: ఈ ఏడాది ఎన్ని సైబర్​ కేసులు నమోదయ్యాయంటే..!?