తండాలో ఒకేసారి 38 మందికి కరోనా.. ఉలిక్కిపడ్డ స్థానికులు

రాష్ట్రంలో కరోనా కేసులు రోజురోజుకూ పెరుగుతున్నాయి. ఇటీవల గ్రామాల్లో, తండాల్లో చాలామంది వైరస్ బారిన పడుతున్నారు. సంగారెడ్డి జిల్లాలోని ఓ తండాలో ఒకేసారి 38 మందికి పాజిటివ్ అని తేలింది. ఈ క్రమంలో తండావాసులు ఉలిక్కిపడ్డారు.

రాష్ట్రంలో కరోనా బుసలు కొడుతోంది. సంగారెడ్డి జిల్లా కంగ్టి మండలంలోని రాజారాం తండాకు చెందిన 38 మందికి పాజిటివ్ అని తేలింది. 68 పరీక్షలు నిర్వహించగా 39 మందికి వైరస్ నిర్ధరణ అయిందని మండల వైద్యాధికారి మనోహర్‌రెడ్డి తెలిపారు.

కంగ్టి మండలంలో ఆయా గ్రామాలకు చెందిన 163 మందికి పరీక్షలు నిర్వహించినట్లు వెల్లడించారు. తండాకు చెందిన 68మందికి పరీక్షలు చేయగా 39 మంది మహమ్మారి బారిన పడ్డారని తేలిందన్నారు. అందులో 38 మంది ఒకే తండాకు చెందిన వారు కావడంతో స్థానికులు ఉలిక్కిపడ్డారు. మరొకరు చౌకన్​పల్లి నివాసి.

బాధితులను హోం క్వారంటైన్​లో ఉంచామని.. వారికి అవసరమైన మందులు పంపిణీ చేశామన్నారు. తండాలో పారిశుద్ధ్య పనులు చేపట్టామని సర్పంచ్ పరుశురావ్ రాఠోడ్ తెలిపారు.

ఇదీ చదవండి:సొంతూళ్లకు వలస కూలీల పయనం.. ఆ భయంతోనే?