మూసీనది కాలుష్యాన్ని నివారించి పర్యావరణహితంగా పునర్జీవింపజేసేందుకు ప్రణాళికబద్ధంగా పనులు కొనసాగించాలని ఎన్‌జీటీ నియమించిన మానిటరింగ్ కమిటీ ఛైర్మన్ జస్టిస్ విలాస్‌ వీ అఫ్జల్‌ పుర్కర్ అధికారులకు సూచించారు. రంగారెడ్డి కలెక్టరేట్‌లో హైదరాబాద్ కలెక్టర్ శ్వేతా మహంతి, రంగారెడ్డి అదనపు కలెక్టర్ ప్రతీక్ జైన్ ఇతర సభ్యులతో నిర్వహించిన సమావేశంలో మూసీ పునరుజ్జీవనానికి వివిధ శాఖల ద్వారా చేపట్టిన పనుల పురోగతిని ఛైర్మన్ సమీక్షించారు.
మూసీ ప్రవహిస్తున్న ప్రధాన ప్రాంతాల్లో మురుగునీటి శుద్ధి ప్లాంట్లు ఏర్పాటు చేస్తున్నట్లు ఈ కమిటీకి మెంబర్‌ కన్వీనర్‌గా వ్యవహారిస్తున్న జాయింట్ చీఫ్ ఎన్విరాన్‌మెంట్‌ ఇంజినీర్ సీవై నగేశ్ సమీక్షలో తెలిపారు. మొదటి దశ కింద బాపూ ఘాట్‌ నుంచి నాగోల్‌ వరకు దాదాపు 20 కిలోమీటర్ల పొడవునా మూసీలో పేరుకుపోయిన చెత్త చెదారాన్ని, గుర్రపుడెక్కను పూడిక యంత్రాల ద్వారా తొలగించినట్లు మూసీ రివర్ ఫ్రంట్‌ డెవలప్‌మెంట్‌ కార్పోరేషన్ చీఫ్ ఇంజినీర్ మోహన్ నాయక్ వివరించారు.