ఓవైసీ ఆస్పత్రికి గుమస్తా చంద్రయ్య తరలింపు

అబ్దుల్లాపూర్​మెట్​ తహసీల్దార్​ విజయారెడ్డి సజీవదహనం ఘటనలో తీవ్రగాయాలైన గుమస్తా చంద్రయ్యను ఓవైసీ ఆస్పత్రికి తరలించారు. ప్రమాదం అనంతరం ఆదుకుంటామని అధికారులు, ప్రజాప్రతినిధులు హామీ ఇచ్చినా ఇప్పటికి హామీ నెరవేరలేదని వాపోయారు.

రాష్ట్రవ్యాప్తంగా సంచలనం సృష్టించిన రంగారెడ్డి జిల్లా అబ్దుల్లాపూర్​మెట్​ తహసీల్దార్​ విజయారెడ్డి సజీవదహనం ఘటనలో గాయపడిన గుమస్తా చంద్రయ్యను అపోలో డీఆర్​డీవో ఆస్పత్రి నుంచి ఓవైసీ ఆస్పత్రికి తరలించారు. ప్రమాదం జరిగిన నుంచి చంద్రయ్య ఆరోగ్య పరిస్థితి మెరుగుపడలేదని బంధువులు ఆందోళన వ్యక్తం చేశారు.

అన్ని విధాల ఆదుకుంటామని ప్రభుత్వం హామీ ఇచ్చినా ఇప్పటికీ నెరవేరలేదన్నారు. వైద్య ఖర్చులు భరించాలని, లేకుంటే ప్రభుత్వం నుంచి హామీ పత్రం తీసుకురావాలని అపోలో డీఆర్​డీవో వైద్యులు స్పష్టం చేశారని బంధువులు ఆవేదన వ్యక్తం చేశారు. ప్రభుత్వం సహకరించకపోతే అబ్దుల్లాపూర్​ తహసీల్దార్​ కార్యాలయం ఎదుటే ఆత్మహత్య చేసుకోవడం తప్ప మరే దిక్కు లేదని వాపోయారు.

ఇవీచూడండి: తహసీల్దార్ దారుణ హత్య... నాగోల్​లో అంత్యక్రియలు