సొంతూరి కన్నా ఇక్కడే బాగుంది సార్..

హైదరాబాద్‌లో వలసకూలీల శిబిరాలను మంత్రి కేటీఆర్ సందర్శించారు. వలసకూలీల యోగక్షేమాలు, వారి పరిస్థితులు అడిగి తెలుసుకున్నారు. ఆహారం, రేషన్ సరకులు గురించి ఆరా తీశారు. లాక్‌డౌన్‌ నిబంధనలు పాటించాలని కోరారు. ఆరోగ్యాన్ని కాపాడుకోవాలని సూచించారు. త్వరలోనే సంక్షోభం తొలగిపోతుందని ఆశాభావం వ్యక్తం చేశారు.

హైదరాబాద్ నగరంలోని వలసకూలీల పరిస్థితులు, యోగక్షేమాలు తెలుసుకునేందుకు పురపాలకశాఖ మంత్రి కేటీఆర్ క్షేత్రస్థాయిలో పర్యటించారు. గచ్చిబౌలి ప్రాంతంలో ఓ నిర్మాణ కంపెనీ సైట్లో పనిచేస్తున్న ఒడిశా, బంగాల్, బిహార్ తదితర రాష్ట్రాలకు చెందిన 400 మంది కూలీలను పలకరించారు. వలస కూలీలతో మాట్లాడి వారి స్థితిగతులు, యోగక్షేమాలు తెలుసుకున్న కేటీఆర్... అందుతున్న ఆహారం, రేషన్ సరుకుల గురించి ఆరా తీశారు. ఏవైనా ఇబ్బందులు ఎదురవుతున్నాయా అని వలసకూలీలను అడిగారు.

త్వరలోనే సంక్షోభం పోతుంది

లాక్ డౌన్ మరో రెండు వారాలు పొడిగించినందున నిబంధనలు పాటించాలని మంత్రి కేటీఆర్ కోరారు. ఆరోగ్యాన్ని కాపాడుకోవాలని సూచించారు. త్వరలోనే కరోనా మహమ్మారి సంక్షోభం తొలగిపోతుందని భరోసా ఇచ్చారు. అప్పటి వరకు బయటకు వెళ్లకుండా ఏర్పాటు చేసిన వసతిలోనే ఉండాలని మంత్రి కోరారు.

ఇబ్బంది లేదు

పని లేనందున సొంత ప్రాంతాలకు పోవాలని ఉందా అని కేటీఆర్​ అడిగారు. ప్రస్తుతం తమకు ఇక్కడ ఎలాంటి ఇబ్బంది లేదని... ఇక్కడ క్షేమంగానే ఉన్నామని మంత్రికి వలసకూలీలు తెలిపారు. రెండు వారాల పాటు కనీస అవసరాలను తీరుస్తూ జాగ్రత్తగా చూసుకోవాలని నిర్మాణ కంపెనీ ప్రతినిధులు, స్థానిక అధికారులకు మంత్రి సూచించారు.

ఇదీ చూడండి:' అప్పుడు ఎంత కరెంట్​ బిల్లు కట్టారో ఇప్పుడు అంతే కట్టండి'