శతవిధాలా ప్రయత్నిస్తున్నారు.. అయినా కానీ..

కాటేదాన్​లోని వ్యవసాయ పొలంలో నక్కిన చిరుతను బంధించేందుకు అటవీ శాఖాధికారులు శతవిధాలా ప్రయత్నిస్తున్నారు. చిరుతను పట్టుకునే క్రమంలో ఒకవేళ అది ఇళ్లల్లోకి వెళితే.. మనుషులపై దాడి చేసే ప్రమాదముందని అటవీశాఖాధికారులు, పోలీసులు భావిస్తున్నారు.

కాటేదాన్ ప్రధాన రహదారిపై కనిపించిన చిరుత ప్రస్తుతం పొదల్లో నక్కి ఉందని... రాత్రి వేళ అది ఆహారం, నీళ్ల కోసం బయటికి రావొచ్చని అధికారులు అంచనా వేస్తున్నారు. చిరుతను బంధించేందుకు బోన్లను వ్యవసాయ పొలంలో ఏర్పాటు చేశారు. బోన్లలో మేకను ఎరగా వేస్తున్నారు. మేక శబ్దం విని దాన్ని తినడానికి చిరుత బోన్​లోకి వచ్చి చిక్కుతుందని భావిస్తున్నారు.

50ఎకరాలకు పైగా విస్తీర్ణంలో ఉన్న పొలంలో చుట్టు పొదలున్నాయి. పొదల్లో నక్కిన చిరుతను బంధించేందుకు అటవీ, పోలీసు అధికారులు పకడ్బందీగా వ్యవహరిస్తున్నారు. డ్రోన్ కెమెరా, కెమెరా ట్రాప్​ల ద్వారా చిరుత నక్కిన ప్రదేశాన్ని గుర్తించేందుకు ప్రయత్నిస్తున్నారు. రాత్రివేళల్లో బుద్వేల్, నేతాజి నగర్, కాటేదాన్ వాసులు బయటికి రావొద్దని పోలీసులు విజ్ఞప్తి చేస్తున్నారు

ఈ రోజు తెల్లవారుజామున 4 గంటల సమయంలో కాటేదాన్ ప్రధాన రహదారిపై చిరుతను స్థానికులు గుర్తించారు. రైల్వే అండర్ పాస్ బ్రిడ్జి వద్ద ఉన్న కాల్వలో నక్కిన చిరుత 8 గంటల సమయంలో బయటికి వచ్చింది. జనసంచారానికి బయటికి డివైడర్ పక్కనే నక్కింది. ప్రజలు కేకలు వేయడంతో భయపడి అక్కడి నుంచి సమీపంలో ఉన్న బొప్పాయి తోటలోకి పారిపోయింది. ఈ క్రమంలో అక్కడే ఉన్న ఓ వ్యక్తిని స్వల్పంగా గాయపర్చింది.

ఇవీ చూడండి:పిల్లుల్లోనూ కరోనా వ్యాప్తి.. వాటి నుంచి మనుషులకు?