రాజన్న సిరిసిల్ల జిల్లాలో పలు అభివృద్ధి పనులకు పురపాలక, ఐటీ శాఖ మంత్రి కేటీఆర్ భూమి పూజ చేశారు. నర్మాలలో ఫుడ్ ప్రాసెసింగ్ యూనిట్కు శంకుస్థాపన చేశారు. అనంతరం స్థానికులతో ఏర్పాటు చేసిన సభలో పాల్గొన్నారు. కేసీఆర్ ప్రభుత్వం అధికారంలోకి వచ్చాక.. రైతుల జీవితాలు మెరుగవుతున్నాయని తెలిపారు. రైతు బంధు ఇచ్చి అన్నదాతలను ఆదుకుంటున్నామని... ఏ కారణంతో వారు మరణించినా... రూ.5 లక్షల బీమా ఇచ్చి.. అన్నదాత కుటుంబానికి అండగా నిలుస్తున్నామని గుర్తు చేశారు.
గతంలో గోదాముల సామర్థ్యం 4 లక్షల మెట్రిక్‌ టన్నులు మాత్రమే ఉండేదని.. ఇప్పుడు 25 లక్షల మెట్రిక్‌ టన్నులకు పెంచామని వెల్లడించారు. తెలంగాణ దేశానికి ధాన్యాగారంగా మారిందన్నారు. రాష్ట్రంలో హరిత, నీలి, గులాబీ, శ్వేత విప్లవాలు ఆవిష్కృతమవుతున్నాయని.. ఈ విప్లవాలతో గ్రామీణ ఆర్థిక జీవనంలో మార్పు వచ్చిందని తెలిపారు.