మల్క​పేట రిజర్వాయర్ పనుల్లో రాజీ పడొద్దు: కేటీఆర్

రాజన్న సిరిసిల్ల జిల్లాలో మల్కపేటలో నిర్మిస్తున్న ప్యాకేజీ-9 పనులను మంత్రి కేటీఆర్​ పరిశీలించారు. వచ్చే దసరానాటికి పనులను పూర్తిచేసి ఎగువమానేరు నుంచి గోదావరి జలాలను మల్కపేట రైతులకు అందించాలని అధికారులకు ఆదేశించారు.

వచ్చే దసరా నాటికి ప్యాకేజీ-9 పనులను వందశాతం పూర్తి చేయాలని మంత్రి కేటీఆర్​ ఇరిగేషన్ అధికారులను ఆదేశించారు. రాజన్నసిరిసిల్ల జిల్లా కోనరావుపేట మండలం మల్కపేటలోని ప్యాకేజీ-9 సొరంగ మార్గం, బండ్​, లైనింగ్, పంప్ హౌజ్ నిర్మాణం పనులను క్షేత్ర స్థాయిలో మంత్రి పరిశీలించారు. పనులు ఆశించిన మేరావేగంగా సాగడం లేదని మంత్రి ఇరిగేషన్ అధికారులపై అసంతృప్తి వ్యక్తం చేశారు. పనులు మరింత వేగంగా చేపట్టాలని అధికారులను ఆదేశించారు.

వాల్​పేట జలాశయం, మల్కపేట జలాశయం పర్యాటక అభివృద్ధికి అన్ని విధాలుగా అనుకూలంగా ఉన్నందున ఆ దిశగా ప్రణాళికలు సిద్ధం చేయాలని అధికారులకు సూచించారు. ప్రతి బండ్​కు ప్రత్యేక థీమ్​తో ఆహ్లాదం కలిగించే పూల మొక్కలను హరితహారంలో భాగంగా నాటాలని మంత్రి.. అటవీ అధికారులను ఆదేశించారు.

ఇదీ చదవండి:'తెలంగాణకు కేసీఆర్ దేవుడిచ్చిన వరం'