రామగుండం కమిషనరేట్​ నిర్మాణాన్ని పరిశీలించిన కోలేటి దామోదర్

పెద్దపల్లి జిల్లా గోదావరిఖనిలో నిర్మిస్తున్న రామగుండం కమిషనరేట్​ కార్యాలయం, గాంధీనగర్​లోని పోలీస్​ అతిథి గృహం పనులను పోలీస్​ హౌసింగ్​ కార్పొరేషన్​ ఛైర్మన్​ కోలేటి దామోదర్​ పరిశీలించారు. కార్యక్రమంలో ఆయనతో పాటు సీపీ సత్యనారాయణ పాల్గొన్నారు.

పోలీస్​ వ్యవస్థ పటిష్ఠంగా ఉంటేనే ప్రజలు ఎలాంటి భయభ్రాంతులు లేకుండా నిర్భయంగా ఉంటారని పోలీస్​ హౌసింగ్​ కార్పొరేషన్​ ఛైర్మన్​ కోలేటి దామోదర్​ అన్నారు. ఈ మేరకు పెద్దపల్లి జిల్లా గోదావరిఖనిలో నూతనంగా నిర్మిస్తున్న రామగుండం కమిషనరేట్​ కార్యాలయంతో పాటు గాంధీనగర్​లో నిర్మిస్తున్న పోలీస్​ అతిథి గృహం పనులను రామగుండం సీపీ సత్యనారాయణతో కలిసి పరిశీలించారు.

ముఖ్యమంత్రి కేసీఆర్​ ఆదేశాల మేరకు రాష్ట్రంలో ఏర్పాటు చేసిన కమిషనరేట్​ కార్యాలయాలతో పాటు నూతన పీఎస్​లో నిర్మాణ పనులు పూర్తి కావస్తున్నాయని కోలేటి దామోదర్​ తెలిపారు. పూర్తయిన కమిషనరేట్​, ఎస్పీ కార్యాలయాలను త్వరలో సీఎం కేసీఆర్​ ప్రారంభించేలా ఏర్పాటు చేస్తున్నామన్నారు. మంత్రి కేటీఆర్​తో మాట్లాడి రామగుండం కమిషనరేట్​ పరిధిలో విశాలమైన కమ్యూనిటీ హాల్​ కట్టిస్తామని హామీ ఇచ్చారు.

ఇదీ చదవండిఃపోలీస్​ దేహదారుఢ్య పరీక్షలకు సిద్ధమవుతున్న ఆలేరు కళాశాల