రామగుండానికి అభివృద్ధి బాటలు పడేదెన్నడో...?

పారిశ్రామిక ప్రాంతంగా పేరొందిన రామగుండం నగరపాలక సంస్థ... పేరు గొప్ప ఊరు దిబ్బ అన్న చందంగా మారింది. ప్రభుత్వం కోట్ల నిధులు విడుదల చేస్తున్నా... పకడ్బందీ ప్రణాళికలు లేక అభివృద్ధి అందని ద్రాక్షగానే ఉంది. ఐదేళ్ల పాలకవర్గంలో అధికార పార్టీ అంతర్గత తగాదాలతోనే అభివృద్ది నిలిచిపోయింది. ఈసారైనా సరైన అభ్యర్ధులను ఎన్నుకోవాలని ప్రజలు భావిస్తున్నారు. ఈసారి ఎన్నికల్లోనూ స్థానిక సమస్యలే అత్యంత ప్రభావం చూపనున్నాయి.

1995లో పురపాలక సంఘంగా ఏర్పడిన రామగుండంలో మెుదటిసారి 1997లో ప్రత్యక్ష ఎన్నికలు జరిగాయి. 2001లో ప్రథమ శ్రేణి, 2010లో ప్రత్యేక శ్రేణి పురపాలక సంఘంగా అభివృద్ధి చెందగా... 2013లో నగరపాలక ప్రాంతంగా ప్రభుత్వం ప్రకటించింది. రామగుండంలో పరిశ్రమలకు అవసరమైన బొగ్గు, నీరుతో పాటు ఇతర మౌలిక సదుపాయాలు అందుబాటులో ఉండడంతో ఈ ప్రాంతం పారిశ్రామికంగా ప్రగతిని సాధిస్తోంది. దశలవారీగా సింగరేణి బొగ్గు గనులతో పాటు థర్మల్ కేంద్రం, ఎరువుల కర్మాగారం, ఎస్టీపీసీ తదితర పరిశ్రమలు రావటంతో ఈ ప్రాంతానికి ప్రాధాన్యం పెరిగింది. సింగరేణి, ఎన్టీపీసీ, ఆర్​ఎఫ్​సీఎల్​ కర్మాగారాల ఏర్పాటుతో ఈ ప్రాంత జనాభా క్రమంగా పెరుగుతూ వస్తోంది. అతిపెద్ద పారిశ్రామిక ప్రాంతం కావడంతో ఈ ప్రాంతాన్ని పార్టీలన్నీ ప్రతిష్ఠాత్మకంగా తీసుకున్నాయి.

గోదావరి నదీ ఉన్నా తాగే నీరేది..?

రామగుండం ప్రాంతం ఎన్నో పరిశ్రమలకు నిలయంగా ఉన్నప్పటికీ... సమస్యలు కూడా అదే స్థాయిలో వెంటాడుతున్నాయి. పాలకవర్గంలో ఎవరున్నా... నిధుల సద్వినియోగంలో విఫలమవుతున్నారనే భావన ప్రజల్లో వ్యక్తమవుతోంది. ప్రజల అవసరాలకు అనుగుణంగా సదుపాయాలు కల్పించలేక పోతున్నారని అంటున్నారు. సమీపంలో గోదావరినది, ఎల్లంపల్లి ప్రాజెక్టు ఉన్నప్పటికీ... తాగునీటికి అనేక ఇబ్బందుల పడే పరిస్థితి ఉంది. అమృత్‌ పథకంలో భాగంగా దాదాపు 2వేల ఇళ్లకు కుళాయి కనెక్షన్లు ఇచ్చినా..... అందులోకి నీరు సరఫరా మాత్రం కావడం లేదు. పలుసార్లు పట్టణవాసులు నీటి కోసం రోడ్డెక్కిన పరిస్థితులు కూడా ఉన్నాయి.

రహదారుల విస్తరణ పనులకు మోక్షం ఎప్పుడు..?

రోజురోజుకు రామగుండంలో రద్దీ పెరుగుతున్నప్పటికీ... రహదారుల విస్తరణ పనులకు మోక్షం కలగడంలేదు. పట్టణంలోని అక్కడక్కడ ప్రధాన రోడ్లు దెబ్బతిని అనేక ప్రమాదాలు జరుగుతున్నాయి. రామగుండం మున్సిపాలిటీ కార్యాలయం నుంచి ఫైవ్‌ ఇంక్లైన్ వరకు నిర్మించనున్న రోడ్డు విస్తరణ పనులు ఏళ్లు గడిచినా పూర్తి కావట్లేదు. వర్షకాలంలో వివిధ రోడ్ల పరిస్థితి మరి దారుణంగా ఉంటోంది. రోడ్లపైకి నీరు చేరడంతో వాహనదారులు అనేక అవస్థలు పడుతున్నారు. మరోవైపు వీధుల్లో అండర్‌ డ్రైనేజీ కోసం తవ్విన రోడ్లన్నీ పాడైపోయాయి. పట్టణంలోని ఆయా వార్డుల్లో వీధీదీపాలు లేక స్థానికులు ఇబ్బందులు పడుతున్నారు.

కాగితాలకే పరిమితమైన చెత్త సేకరణ

పట్టణంలో ఇంటింటి చెత్త సేకరణ కేవలం కాగితాలకే పరిమితమైంది. అనేక చోట్ల మురుగు నీరు నిలిచి పందులకు ఆవాసాలుగా మారిపోయాయి. దోమలు, ఈగలు చేరి ప‌ట్టణ ప్రజలు రోగాల బారిన పడుతున్నారు. ప్రధానంగా RFCL నుంచి వచ్చే నీటితో గౌతమ్‌నగర్‌ వాసులు తీవ్ర అవస్థలు ఎదుర్కొంటున్నారు. ఇళ్ల మధ్యలో ఖాళీ స్థలాల్లో నిలిచిన నీటి వల్ల వ్యాధుల బారిన పడుతున్నామని ఆవేదన వ్యక్తం చేస్తున్నారు. ఏళ్లుగా గౌతమ్‌ నగర్‌ రోడ్డు కంకరతోనే ఉందని... పలుమార్లు అధికారులకు విన్నవించుకున్నా పట్టించుకోవట్లేదని చెబుతున్నారు.

ఆహ్లాదాన్ని పంచే పార్కులేవి..?

రామగుండం పారిశ్రామికంగా ఎంతో అభివృద్ధి చెందినా... ప్రజలకు ఆహ్లాదాన్ని అందించే పార్కులు కరవయ్యాయి. ఐదు పార్కులు నిర్మాణంలో ఉన్నప్పటికీ ఏళ్లు గడిచినా అందులో ఏ ఒక్కటి పూర్తి కాలేదు. కూరగాయల మార్కెట్‌, ఆడిటోరియం, గ్రంథాలయాల కోసం కొత్త భవనాలు కావాలని ప్రతిపాదించినా.... కార్యరూపం దాల్చడం లేదు. 90 కోట్లతో నిర్మించనున్న మురుగునీరు శుద్ధి యంత్రం ఇప్పటికీ ప్రారంభించలేదు. ప్రస్తుతం ఉన్న ప్లాంటు చెడిపోగా... కలుషిత నీరే గోదావరిలో కలుస్తోంది.

రామగుండం పురపాలక కమిషనరేట్‌గా అభివృద్ధి చెందినప్పటికీ సౌకర్యాల కల్పనలో మాత్రం వెనకబడే ఉంది. ఏళ్లుగా అనేక సమస్యలను ఎదుర్కొంటున్న పట్టణవాసులు... ఈ సారైనా పరిష్కరించేవారిని ఎన్నుకోవాలని భావిస్తున్నారు.