Harish Rao Fire On Central: పేదలకు మెరుగైన వైద్య సేవలు అందించడంలో దేశంలోనే తెలంగాణ మూడో స్థానంలో ఉన్నట్లు కేంద్రప్రభుత్వ నివేదికలే చెబుతున్నాయని మంత్రి హరీశ్ రావు అన్నారు. దేశంలో అత్యుత్తమ వైద్య సేవలు అందిస్తున్న మూడు రాష్ట్రాలు భాజయేతర రాష్ట్రాలే అని స్పష్టం చేశారు. డబుల్ ఇంజన్ సర్కార్ అంటున్న భాజపా అధికారంలో ఉన్న ఉత్తర్ప్రదేశ్ వైద్యసేవల్లో చిట్టచివరిగా 28 స్థానంలో నిలిచిందని హరీష్‌రావు ఎద్దేవా చేశారు. పెద్దపల్లి జిల్లా మంథనిలో పర్యటించి మంత్రి రూ.7 కోట్లతో నిర్మించిన మాతాశిశు కేంద్రాన్ని సంక్షేమ శాఖమంత్రి కొప్పుల ఈశ్వర్‌తో కలిసి ప్రారంభించారు.
రాష్ట్రం ఏర్పడక ముందు ఆరు ఐసీయూ కేంద్రాలు ఉంటే ఇప్పుడు రెండు వందలు ఏర్పాటు చేశామన్నారు. గడిచిన 70 ఏళ్లలో 3 మెడికల్ కాలేజీలు ఏర్పాటు చేస్తే రాష్ట్రం వచ్చాక 33 ఏర్పాటు చేశామన్నారు. ఉమ్మడి కరీంనగర్ జిల్లాలో ఇప్పటి వరకు ఒక్క మెడికల్ కాలేజీ తీసుకు రాలేకపోయారని..ఈ ప్రభుత్వం నాలుగు మెడికల్ కాలేజీని తీసుకొచ్చిందని హరీష్‌రావు వివరించారు.
కేంద్రంలో ఖాళీగా ఉన్న ఉద్యోగాలను భర్తీ చేయకుండా.. అగ్నిపథ్ అనే కొత్త పథకం తీసుకొచ్చారని దుయ్యబట్టారు. యువకులు దేశం కోసం పోరాడుతామంటే నాలుగేళ్లు ఉద్యోగం చేసి ఇళ్లకు పోయి ఏం చేయాలని ప్రశ్నించారు. నాలుగేళ్లలో ఒక సంవత్సరం శిక్షణలో పోతుందని.. మూడేళ్లు ఉద్యోగం చేసి ఇంట్లో కూర్చుంటే అతనికి పిల్లను ఎవరిస్తారని ఎద్దేవా చేశారు. పింఛన్లు, బెనిఫిట్స్ అడిగిన వాళ్లపై కేసులు పెడతామని బ్లాక్‌మెయిల్‌కు పాల్పడుతున్నారని అన్నారు.
ప్రజల తలసరి ఆదాయం పెరిగింది. తెలంగాణ సాధించుకున్నాకే అభివృద్ధి జరిగింది. కాళేశ్వరంతో రాష్ట్రం పచ్చగా మారింది. రాష్ట్రం ఏర్పడ్డాక రెండున్నర లక్షల ఉద్యోగాలు ఇస్తున్నాం. కేంద్రం ఉద్యోగాలివ్వకుండా నిరుద్యోగులను మోసం చేస్తోంది. ఇప్పుడేమో అగ్నిపథ్ తీసుకొచ్చింది. నాలుగేళ్లకు ఎవరైనా నౌకరీలు ఇస్తారా? తర్వాత పరిస్థితి ఏంటీ? ఇవాళ యువతను మోసం చేస్తోంది కేంద్ర ప్రభుత్వం. దేశవ్యాప్తంగా యువత రోడ్లమీదకు వచ్చి ఆందోళనలు చేస్తున్నారు. యువతను మీరు రెచ్చగొడుతున్నరు. భాజపా నాయకులు ఏం సమాధానం చెబుతారు. మీరు చేసిన ఒక్క మంచి పనైనా ఉంటే చెప్పండి.