Farmers Protest in Telangana : 'కొనుగోళ్ల తీరుపై అన్నదాత ఆగ్రహం.. రోడ్డెక్కి నిరసనలు'

Farmers Protest in Telangana : అకాల వర్షం అన్నదాతను కోలుకోలేని దెబ్బతీస్తోంది. కల్లాల్లో ఉంచిన ధాన్యం తడిసి నష్టాల పాలవుతున్నాడు. ఆశించిన స్థాయిలో కొనుగోళ్లు జరగక కేంద్రాల్లోనే కర్షకులు పడిగాపులు కాస్తున్నారు. రోజుల తరబడి ఎదురుచూస్తున్నా వడ్లు కాంటా కాకపోవటంతో ఆగ్రహం చెందిన రైతులు రోడ్డెక్కుతున్నారు.

Farmers Protest in Telangana : రైతులను అకాల వర్షం వెంటాడుతోంది. కరీంనగర్‌ జిల్లా హుజూరాబాద్‌, జమ్మికుంట, వీణవంక, ఇల్లందకుంట మండలాల్లో వానకు ధాన్యం తడిసింది. జమ్మికుంట వ్యవసాయ మార్కెట్‌లో 5 వేల క్వింటాళ్ల వరకు ధాన్యం నీటిపాలైంది. తూకం వేసి రవాణాకు సిద్ధంగా ఉన్న మూడు ట్రాక్టర్ల ధాన్యం తడవడంతో.. రైతులు ఆందోళనకు గురవుతున్నారు. పెద్దపెల్లి జిల్లా మంథని, ముత్తారం, రామగిరి మండలాల్లో వర్షానికి కొనుగోలు కేంద్రాల్లోని ధాన్యం తడిసింది.

"మంత్రులు, సీఎం తడిసిన ధాన్యం కొనుగోలు చేస్తాం.. రైతులు బాధపడకండి అంటున్నారు. కానీ ఇక్కడ ఆ పరిస్థితి లేదు. మిల్లర్లు తడిసిన ధాన్యం, మొలకలు వచ్చిన ధాన్యం పేరుతో చాలా ఎక్కువ మొత్తంలో కటింగ్‌ చేస్తున్నారు. తరుగు లేకుండా తగిన ధరను ప్రకటించాలి. అకాల వర్షాలతో నష్ట పోయిన రైతులను ప్రభుత్వం ఆదుకోవాలి. నెల రోజుల నుంచి చాలా ఇబ్బంది పడుతున్నాం".- రైతులు

మంథని మార్కెట్ యార్డులో ఆరబోసిన వడ్లు నీటి పాలయ్యాయి. కొనుగోళ్లలో వేగం పెంచి తడిసిన వడ్లనూ కొనుగోలు చేయాలని రైతులు డిమాండ్‌ చేశారు. అకాల వర్షం దెబ్బకు పొలాల్లో పంట నష్టపోయిన రైతులు శ్రమకోర్చి తెచ్చిన ధాన్యం అమ్ముకునేందుకు రైతులకు అవస్థలు తప్పడం లేదు. కొనుగోళ్లలో వేగం పెంచాలని డిమాండ్‌ చేస్తూ పలు జిల్లాల్లో రైతులు రోడ్డెక్కారు. నిజామాబాద్ జిల్లా తానాఖుర్దులో మొలకెత్తిన ధాన్యంతో రోడ్డుపై బైఠాయించారు. ఐకేపీ కేంద్రాలకు వడ్లు తరలించి నెల దాటినా కాంటా వేయట్లేదని మహబూబాబాద్‌ జిల్లా అమ్మపురలో రోడ్డుపై ముళ్ల కంచెతో నిరసన తెలిపారు.

తాలు, తేమ పేరుతో మిల్లర్లు ఇష్టారీతిన తరుగు తీస్తున్నారని మండిపడ్డారు. ఐకేపీ సెంటర్లలో వసతుల కొరత అన్నదాతలను తీవ్రంగా వేధిస్తోంది. ధాన్యాన్ని తరలించేందుకు లారీల కొరతతో కొనుగోళ్ల కోసం అన్నదాతలు పడిగాపులు కాస్తున్నారు. నల్గొండ జిల్లా మాడ్గులపల్లిలోని అద్దంకి-నార్కట్‌పల్లి జాతీయ రహదారిపై రైతులు రాస్తారోకో నిర్వహించారు. కనగల్‌ మండలం, ఎస్‌ లింగోటం వద్ద హాలియా రహదారిపై రైతులు ముళ్ల కంచె వేసి పురుగుల మందు డబ్బాలతో నిరసన చేపట్టారు. రైతుల అనుమతి లేకుండానే తరుగు పేరుతో కోతలు పెడుతున్నారని ఆవేదన వ్యక్తం చేశారు.

ధాన్యం కొనుగోలు వేగంగా జరగడం లేదు. ప్రభుత్వం తడిసిన ధాన్యం కొనుగోలు చేస్తామని చెప్పినా ఇక్కడ మిల్లర్లు కొనుగోలు చేయడం లేదు. ఐదు రోజులైనా లారీ అన్‌లోడ్‌ చేయడం లేదు. ఏ ఒక్క అధికారి పట్టించుకోవడం లేదు. ధాన్యం బాగా లేవని అధికారులు ఇటువైపు రావడం లేదు.- బాధిత రైతులు

ఇవీ చదవండి: