పెట్రోల్​తో ఎమ్మార్వో కార్యాలయానికొచ్చాడు.. కానీ!

నిజామాబాద్ జిల్లా బోధన్ తహసీల్దార్ కార్యాలయం ఎదుట ఓ వ్యక్తి పెట్రోల్ పోసుకొని ఆత్మహత్యాయత్నానికి ప్రయత్నించాడు. ఇదంతా కాంగ్రెస్ సీనియర్ నేత వీహెచ్ ఎదుటే జరగడం గమనార్హం.

నిజామాబాద్ జిల్లా బోధన్ తహసీల్దార్ కార్యాలయానికి పెట్రోల్ బాటిల్ తీసుకొని వచ్చిన ఓ వ్యక్తి సీనియర్ కాంగ్రెస్ నేత వీహెచ్ ఎదుటే ఆత్మహత్యాయత్నం చేసుకున్నాడు. బోధన్ మండలం సాలూరకు చెందిన నజీర్ అనే వ్యక్తి సాలూర గ్రామంలోని బస్టాండులో హోటల్ నిర్వహించేవాడు.

రెండేళ్ల క్రితం అధికార పార్టీకి చెందిన కొందరు వ్యక్తులు తన హోటల్​ని కూల్చి, అందులోని సామాన్లను తగలబెట్టారని నజీర్ వాపోయాడు. అనంతరం ఆ భూమిని కబ్జా చేసేందుకు ప్రయత్నిస్తే... తాను కోర్టుకు వెళ్లి ఆ భూమి తన ఆధీనంలోకి వచ్చేలా పట్టా తెచ్చుకున్నానని బాధితుడు చెబుతున్నాడు.

అలా పట్టా తెచ్చుకున్నప్పటికీ.. ప్రజాప్రతినిధుల అండదండలతో తనని అక్కడ హోటల్ నిర్వహించకుండా చేస్తున్నారని ఆవేదన వ్యక్తం చేస్తున్నాడు. దాదాపు 8 లక్షల రూపాయల అప్పు ఉందని అలాగే తన ఆరుగురు పిల్లలను పోషించడం చాలా కష్టంగా మారిందని వాపోతున్నాడు. ఇప్పటికైనా అధికారులు స్పందించి తాను హోటల్ నిర్వహించుకునేందుకు సహకరించాలని నజీర్ డిమాండ్ చేశాడు.

ఇవీ చూడండి: ఆర్టీఐ పరిధిలోకి సీజేఐ కార్యాలయం- సుప్రీం సంచలన తీర్పు