'వ్యవసాయ బిల్లుతో చీకట్లోకి రైతన్నల జీవితాలు'

కేంద్రం ప్రవేశపెట్టిన వ్యవసాయ బిల్లును ఉపసంహరించుకోవాలని నిజామాబాద్​ జిల్లా కాంగ్రెస్​ కమిటీ డిమాండ్ చేసింది. ఈమేరకు కమిటీ సభ్యులు జిల్లా కలెక్టర్ నారాయణరెడ్డికి వినతి పత్రాన్ని అందజేశారు.

కోట్లాది రైతుల సంక్షేమాన్ని పణంగా పెట్టి తమకు మద్దతుగా ఉన్న బడా కార్పొరేట్ల కోసం మోదీ సర్కార్ వ్యవసాయ బిల్లును ప్రవేశపెట్టిందని నిజామాబాద్​ జిల్లా కాంగ్రెస్ కమిటీ ఆరోపించింది. వ్యవసాయ బిల్లును వెంటనే ఉపసంహరించుకోవాలని డిమాండ్ చేస్తూ కలెక్టర్ నారాయణరెడ్డికి వినతి పత్రాన్ని అందజేశారు.

ఈ బిల్లుతో కోట్లాది అన్నదాతల జీవితాలు చీకట్లోకి వెళ్లిపోతాయని కమిటీ సభ్యులు ఆవేదన వ్యక్తం చేశారు. దేశంలో వ్యవసాయ రంగం పూర్తిగా సంక్షోభంలోకి పోతుందని వాపోయారు. కొంత మంది వ్యాపారుల లాభాపేక్ష వల్ల పేద, చిన్న, సన్నకారు రైతుల జీవితాలు ఛిన్నాభిన్నమవుతాయని పేర్కొన్నారు.