గత పార్లమెంటు ఎన్నికల్లో నిజామాబాద్ ఎంపీగా పోటీ చేసి ఓటమిపాలైన తర్వాత... కవిత రాజకీయంగా స్తబ్దుగా ఉన్నారు. ఇలాంటి తరుణంలో స్థానిక సంస్థల ఎమ్మెల్సీగా పోటీచేసి విజయం సాధించారు. ఈ నేపథ్యంలోనే ఆమె మంత్రి పదవిని చేపట్టడం ఖాయమన్న ప్రచారం ఊపందుకుంది. ఐతే ఎమ్మెల్సీ అభ్యర్థిగా ఖరారైన నాటి నుంచే కవిత మంత్రి కావడం ఖాయమన్న ప్రచారం మొదలైంది. ఇప్పుడు ఎమ్మెల్సీగా విజయంతో ఇక మంత్రి పదవిని చేపట్టడమే తరువాయి అన్నట్లుగా రాజకీయ వర్గాల్లో చర్చ సాగుతోంది. పోలింగ్, లెక్కింపు సందర్భంగా జిల్లా మంత్రితో పాటు ఎమ్మెల్యేల వ్యాఖ్యలు సైతం ఇందుకు బలం చేకూరుస్తున్నాయి. కవితకు ముఖ్యమంత్రి ఏ పదవి ఇచ్చినా సంపూర్ణ మద్దతు ఉంటుందని.. జిల్లా మంత్రి ప్రశాంత్ రెడ్డి వ్యాఖ్యానించారు.
ఉన్నత పదవి అని ఒకరు... కాబోయే ముఖ్యమంత్రి అని మరొకరు
బోధన్ ఎమ్మెల్యే షకీల్ ఏకంగా కవిత సమక్షంలోనే కాబోయే మంత్రి అంటూ సంబోధించారు. పోలింగ్ సరళిని పరిశీలించేందుకు కవిత బోధన్‌కు వచ్చిన సమయంలో ఎమ్మెల్యే షకీల్ ఈ వ్యాఖ్యలు చేశారు. కవిత అక్కడి నుంచి వెళ్లిన తర్వాత మీడియాతో మాట్లాడుతూ... కవిత మంత్రి కావడం ఖాయమని స్పష్టంగా చెప్పారు. రాబోయే రోజుల్లో కవిత ఉన్నత పదవిని అధిష్ఠిస్తారని నిజామాబాద్ అర్బన్ ఎమ్మెల్యే గణేష్ గుప్తా, రాజకీయాల్లో క్రియాశీలకంగా మారబోతున్నారని ఆర్మూర్ ఎమ్మెల్యే జీవన్ రెడ్డి మీడియాతో పిచ్చాపాటిగా మట్లాడుతూ చెప్పారు.