నిజామాబాద్, కామారెడ్డి జిల్లాల్లో కరోనా తీవ్రత పెరుగుతోంది. రోజువారీ కేసుల సంఖ్య అధికంగానే వస్తున్నాయి. కరోనా మొదటి దశలో కేసుల సంఖ్య వందకు చేరేందుకు మూడు నెలల సమయం పట్టింది కానీ... రెండో దశలో ఒకటి రెండు రోజుల్లోనే ఆ మార్క్ చేరుకుంటోంది. ప్రతి రోజూ వందకు చేరువలో కేసుల సంఖ్య నమోదవుతుండడంతో... అధికారులు అప్రమత్తమవుతున్నారు. ఈనెల 1వ తేదీన 86 మందికి, 2వ తేదీన 83 మందికి, 3వ తేదీన 85, 4వ తేదీన 79, 5వ తేదీన 95, 6వ తేదీన 98 మందికి వైరస్ నిర్ధరణ అయింది. ప్రతి రోజూ 80కి తగ్గకుండా కేసులు నమోదవుతూనే ఉన్నాయి.
సరిహద్దులో మరీ ఎక్కువ..
కామారెడ్డి జిల్లాలో వైరస్ వ్యాప్తి అధికంగా ఉంది. మార్చి 16 నుంచి ఏప్రిల్ 6 తేదీ వరకు 872 మందికి కరోనా సోకింది. మంగళవారం ఒక్కరోజే 183 మందికి కొవిడ్ నిర్ధరణ అయింది. ప్రస్తుతం జిల్లాలో 902 యాక్టివ్ కేసులు ఉన్నాయి. మహారాష్ట్రను జిల్లా సరిహద్దు ఆనుకొని ఉన్న ప్రాంతాల్లో కేసుల తీవ్రత అధికంగా ఉంది. పక్క రాష్ట్రం నుంచి రాకపోకలు సాగించడంతో కేసులు ఇబ్బడిముబ్బడిగా వస్తున్నాయి.