మద్యం మత్తులో కానిస్టేబుల్ వీరంగం

ఎన్నికల విధులకు వెళ్ళిన ఓ కానిస్టేబుల్ మద్యం సేవించి వీరంగం సృష్టించాడు. ఓ పెళ్లి ఇంట్లోకి చొరబడి హంగామా చేస్తే.. స్థానికులు పట్టుకొని చితకబాదారు.

నిజామాబాద్ జిల్లా ఇందల్వాయి మండలంలోని రంజిత్ నాయక్ తండా పోలింగ్ స్టేషన్​లో విధులు నిర్వహించేందుకు వచ్చిన ఓ కానిస్టేబుల్ తండాలో జరుగుతున్న పెళ్లి వద్దకు వెళ్లి వీరంగం సృష్టించాడు. విందులో పాల్గొంటున్న యువకులను బెదిరించి.. నానా గొడవ చేసినట్లు స్థానికులు తెలిపారు. పెళ్లి వారి ఇంట్లో ఓ మహిళ పట్ల అసభ్యకరంగా వ్యవహరించినట్లు తండావాసులు తెలిపారు. కానిస్టేబుల్ వ్యవహరించిన తీరును చూసి కోపోద్రిక్తులైన స్థానికులు చితకబాదారు. ఈ విషయం పోలీసులకు తెలియగానే.. తండాకు చేరుకుని గొడవకు కారణమైన కానిస్టేబుల్​ను పోలీస్ స్టేషన్ కు తరలించారు. సంఘటనా స్థలానికి నిజామాబాద్ ఏసీపీ శ్రీనివాస్ కుమార్, సీఐ వెంకటేశ్వర్లు చేరుకుని విచారణ చేపట్టారు. విధి నిర్వహణలో మద్యం సేవించి తాగిన మైకంలో వీరంగం సృష్టించిన కానిస్టేబుల్​పై తగిన చర్యలు తీసుకుంటామని ఏసీపీ తెలిపారు.