నిజామాబాద్ రూరల్ జిల్లా కేంద్రంలోని సబ్ రిజిస్ట్రార్ కార్యాలయంలో ఏసీబీ అధికారులు దాడులు నిర్వహించారు. దస్తావేజు లేకరి కృష్ణ ప్రసాద్ ఇచ్చిన పక్కా సమాచారం మేరకు అధికారులు కార్యాలయంలో సోదాలు జరిపారు.
కృష్ణ ప్రసాద్ వద్ద రూ.1500 రూపాయలు లంచం తీసుకుంటుండగా ఇంఛార్జీ సబ్ రిజిస్ట్రార్ శ్రీధర్, అతనికి ఏజెంట్గా పనిచేస్తోన్న సంతోష్ అనే ఇద్దరు వ్యక్తులను రెడ్ హ్యాండెడ్గా పట్టుకున్నారు. వారిని అరెస్టు చేసి, కోర్టులో హాజరుపరుస్తామని అధికారులు వెల్లడించారు.
గత నెల 29న మక్లూర్ మండలానికి చెందిన కేతావత్ రమేశ్, కేతావత్ రెడ్డి, కేతావత్ రాణిలు కొత్తగా కొన్న భూమి దస్తావేజుల విషయంలో కృష్ణప్రసాద్ను కలిశారు. వివరాలను దస్తావేజు లేకరి ఆన్లైన్లో నమోదు చేశారు. ఆ మూడు దస్తావేజులకు రూ.3000 రూపాయలు లంచంగా ఇస్తేనే... పని పూర్తవుతుందని.. లేని పక్షంలో వాటిని పక్కన పెడతానని సబ్ రిజిస్ట్రార్ శ్రీధర్ చెప్పారు. చివరకు రూ. 1500 రూపాయలకు ఒప్పందం కుదుర్చుకున్నారు. దీంతో కృష్ణ ప్రసాద్ అనిశా అధికారులకు సమాచారం అందించారు.
ఇదీ చూడండి : నిందితుల దాడిలో ఎస్సై, కానిస్టేబుల్కు గాయాలు: సీపీ