'అంగన్వాడీలకు అన్యాయం చెయ్యొద్దు'

కేంద్రం నూతనంగా ప్రవేశపెట్టిన జాతీయ విద్యా విధానాన్ని రద్దు చేయాలని సీపీఎం జిల్లా కార్యదర్శి రమేశ్​బాబు డిమాండ్ చేశారు. నిజామాబాద్​ కలెక్టర్​ కార్యాలయం వద్ద అంగన్వాడీలతో కలసి పెద్ద ఎత్తున ధర్నా నిర్వహించారు.

నిజామాబాద్ జిల్లా కలెక్టరేట్ వద్ద అంగన్వాడీ కార్యకర్తలు పెద్ద ఎత్తున ధర్నా చేపట్టారు. కేంద్రం తీసుకొచ్చిన నూతన జాతీయ విద్య విధానాన్ని రద్దు చేయాలని వారు డిమాండ్​ చేశారు. చిన్నపిల్లలకు సంరక్షణ, పోషకాహారం, ప్రీ స్కూల్ విద్యను అందిస్తూ వారి సమగ్ర అభివృద్ధికి తోడ్పడుతున్న అంగన్వాడీ కేంద్రాలను మూసివేయాలనడాన్ని తప్పుపట్టారు.

అంగన్వాడీల స్థానంలో బాలవాటిక, కిండర్ గార్డెన్ స్కూల్స్​ పెట్టాలన్న కేంద్ర ప్రభుత్వ నిర్ణయాన్ని వ్యతిరేకించారు. అది అమలు జరిగితే అంగన్వాడీ ఉద్యోగులందరూ ఉపాధి కోల్పోవాల్సి వస్తుందని అంతేకాక పేద ప్రజలకు అందుతున్న పోషకాహార సేవలు కూడా దూరమవుతాయని సీపీఎం జిల్లా కార్యదర్శి రమేశ్​బాబు అన్నారు. గత 45 సంవత్సరాల నుంచి పనిచేస్తున్న అంగన్వాడీ ఉద్యోగుల సేవలను ప్రభుత్వం విస్మరించడం అత్యంత దుర్మార్గమన్నారు. ఈ కార్యక్రమంలో అంగన్వాడీ యూనియన్ జిల్లా అధ్యక్షురాలు కే. దేవగంగు, జిల్లా కార్యదర్శి పి. స్వర్ణ, జిల్లా నాయకులు సునంద, సూర్యకళ, తదితరులు పాల్గొన్నారు.

ఇదీ చూడండి:'ఈనెల 5న రాష్ట్ర వ్యాప్తంగా రాస్తారోకోలకు పిలుపునిచ్చిన ఏఐకేఎస్‌సీసీ'