నిజామాబాద్ జిల్లా బోధన్ మండలం మందర్నాలో దారుణం జరిగింది. వివాహేతర సంబంధానికి అడ్డొస్తున్నాడనే నెపంతో తండ్రి, మరో వ్యక్తితో కలిసి భర్తను హతమార్చింది ఓ ఇల్లాలు. చేసిన పాపం బయటపడి కటకటాల పాలయ్యింది.
కోటగిరి మండలం కల్లూరుకు చెందిన సాయిరాం.. మందర్నాకు చెందిన గంగసారికకు కొన్నేళ్ల కిందట వివాహమైంది. వివాహానంతరం సాయిరాం తన అత్తగారింటికి ఇళ్లరికం వచ్చాడు. పెళ్లికి ముందు నుంచే వేరే వ్యక్తితో వివాహేతర సంబంధం పెట్టుకున్న గంగసారిక... వివాహానంతరం తీరు మారలేదు. ఈ క్రమంలో తమ వివాహేతర సంబంధానికి అడ్డుగా ఉన్న భర్తను అంతమొందించేందుకు తండ్రితో కలిసి పన్నాగం పన్ని శుక్రవారం రాత్రి కిరాతకంగా హత్య చేశారు. మృతదేహాన్ని గ్రామ శివారులోని మంజీరా నది సమీపంలో పూడ్చిపెట్టారు. కుటుంబ సభ్యులు ఫిర్యాదుతో రంగంలోకి దిగిన పోలీసులు విచారణలో అసలు విషయం బయటపడింది.