దొరికిన బంగారాన్ని తిరిగిచ్చేసిన నిజాయితీ గల కార్యదర్శి!

ప్రభుత్వ అధికారులతో ఏదైనా పని పడితే.. చేతిలో లంచం పడనిదే.. ఫైలు ఇంచు కూడా ముందుకు కదలదు. కానీ.. ఓ పంచాయితీ కార్యదర్శి మాత్రం తనకు దొరికిన బంగారాన్ని తిరిగిచ్చేసి తనలో నిజాయితీని నిరూపించుకున్నారు. మంచితనం ఇంకా మిగిలే ఉందనడానికి చిరునామాగా నిలిచారు.

తనకు దొరికిన పది గ్రాముల బంగారాన్ని తిరిగి బాధితుడికే ఇచ్చేసి నిజాయితీ నిరూపించుకున్నారు నిర్మల్​ జిల్లాలో ఓ గ్రామ కార్యదర్శి. నిర్మల్​ జిల్లా సోన్​ మండలంలోని పాకపట్ల గ్రామానికి చెందిన గడ్డం గంగారెడ్డి అనే రైతు తన మనవరాలి శుభకార్యం కోసం నిర్మల్​లో పది గ్రాముల బంగారం కొనుగోలు చేసి ఇంటికి వచ్చాడు. ఇతర పనుల్లో మునిగిపోయి.. బంగారం బయట పెట్టి మరిచిపోయాడు. గంగారెడ్డి తండ్రి ముత్తన్న బంగారం పెట్టిన కవర్​ చూసి.. ఏదో చెత్త కవర్​ అని బయట పారేశాడు.

ఆ సమయంలో అదే గ్రామానికి చెందిన గ్రామ కార్యదర్శి సంధ్యారాణి విధులు ముగించుకొని తిరిగి ఇంటికి వెళ్తున్నారు. రోడ్డుపై కనిపించిన కవర్​ చూసి.. తెరిచి చూడగా.. అందులో రెండు బంగారు ఉంగరాలు కనిపించాయి. వెంటనే ఆ బంగారాన్ని గ్రామ వీఆర్ఏకి అప్పజెప్పారు. బంగారం పోగొట్టుకున్న వారు ఎవరైనా ఉంటే గ్రామ పంచాయతీ కార్యాలయానికి రావాలని గురువారం రాత్రి మైక్ ద్వారా గ్రామంలో చాటింపు వేయించారు. ఆ బంగారం గంగారెడ్డికి చెందినదని. మవనరాలి శుభకార్యానికి తెచ్చినదని తెలిసింది. అందరి సమక్షంలో శుక్రవారం పంచాయితీ కార్యాలయంలో ఆ బంగారాన్ని అప్పజెప్పారు. తనకు దొరికిన బంగారాన్ని తిరిగి వారికే అప్పజెప్పిన గ్రామ కార్యదర్శి సంధ్యారాణిని గ్రామస్తులు అభినందించారు.