నిర్మల్ జిల్లా భైంసా పట్టణంలోని బురుడు గల్లీకి చెందిన పలు కుటుంబాలు మున్సిపల్ కార్యాలయంలో బైఠాయించాయి. గతంలో కుబీర్ బైపాస్ రోడ్డులో తమ ఇళ్లు పోవటంతో అప్పటి నాయకులు, అధికారులు బాధితులకు ఇళ్లు కట్టిస్తామని హామీ ఇచ్చారన్నారు. ఆ హామీతో అక్కడి నుంచి వచ్చి అద్దెకుంటున్నామని బాధితులు తెలిపారు. ఇప్పటి వరకు ప్రభుత్వం తమకు ఇళ్లు కట్టివ్వలేదని వారు ఆవేదన వ్యక్తం చేశారు. ఇప్పటికైనా అధికారులు, నాయకులు స్పందించి రెండు పడక గదుల ఇండ్లు నిర్మించాలని డిమాండ్‌ చేశారు. అధికారులు లేదా నాయకులు వచ్చి హామీ ఇచ్చే వరకు కార్యాలయంలోనే ఉంటామని స్పష్టం చేశారు.
దొంగ పట్టాలిచ్చారు..
పోలీసులు వచ్చి బాధితులకు నచ్చ చెప్పినా వారు వినకుండా కార్యాలయంలో అలాగే కూర్చున్నారు. డిగ్రీ కళాశాల వద్ద ఉన్న స్థలంలో తమకు దొంగ పట్టాలు ఇచ్చారని బాధితులు ఆరోపించారు. ఎమ్మెల్యే, కలెక్టర్ వచ్చి పలుమార్లు చూసినా.. తమకు న్యాయం జరగలేదని వాపోయారు.