మాగనూర్​ వాగును పరిశీలించిన కలెక్టర్​ హరిచందన

ఎడతెరిపి లేకుండా కురుస్తున్న వర్షాలకు నారాయణపేట జిల్లా సంగంబండ రిజర్వాయర్​ నుంచి పెద్ద ఎత్తున నీరు దిగువకు విడుదల చేయగా మాగనూర్​ పెద్ద వాగుపై నీరు ప్రవహిస్తూ రాకపోకలకు అంతరాయం కలిగింది. ఈ మేరకు ఆ ప్రాంతాన్ని కలెక్టర్​ హరిచందన పరిశీలించారు.

నారాయణపేట జిల్లా మక్తల్​ మండలం సంగంబండ రిజర్వాయర్​లో అధికారులు పది గేట్లు ఎత్తి నీటిని దిగువకు విడుదల చేశారు. ఈ మేరకు 167వ జాతీయ రహదారి మాగనూర్​ పెద్ద వాగుపై నుంచి వరద నీరు భారీగా ప్రవహిస్తుండటం వల్ల హైదరాబాద్​ నుంచి రాయచూర్​కు మధ్య కిలోమీటర్​ మేర రాకపోకలు నిలిచిపోయాయి. రహదారిపై జోరుగా ప్రవహిస్తున్న వరదనీటి ఉద్ధృతి తగ్గాక రాకపోకలు యథావిధిగా కొనసాగుతాయని కలెక్టర్​ హరిచందన తెలిపారు.

శుక్రవారం నుంచి ఎడతెరిపి లేకుండా కురుస్తున్న వర్షాలకు వాగుల్లోకి వరద నీరు వస్తుండగా మక్తల్​ మండలంలోని పలు గ్రామాలను కలెక్టర్​ హరిచందన పరిశీలించారు. జాతీయ రహదారిపై ఉద్ధృతంగా ప్రవహిస్తున్న వాగును పరిశీలించి ఎలాంటి అవాంఛనీయ ఘటనలు జరగకుండా చూడాలని అధికారులకు సూచించారు. వాగులోకి ఎవరు ప్రవేశించకుండా పోలీస్​ సిబ్బందిని కాపలాగా ఉంచాలని కలెక్టర్​ పేర్కొన్నారు.

ఇదీ చదవండి:పరువు హత్య: సినీ ఫక్కీలో అల్లుని హత్య... మామతో సహా 14 మంది కటకటాల్లోకి...