ఆస్తుల నమోదు సర్వేను ఆకస్మిక తనిఖీ చేసిన కలెక్టర్

నారాయణపేట జిల్లాలో జరుగుతున్న ఆస్తుల నమోదు సర్వేను జిల్లా పాలనాధికారి హరిచందన ఆకస్మికంగా తనిఖీ చేశారు. మక్తల్​లో సర్వే నిర్వహిస్తున్న అధికారులకు దిశానిర్దేశం చేశారు. యజమానుల వివరాలను జాగ్రత్తగా యాప్​లో నమోదు చేయాలని సూచించారు.

నారాయణపేట జిల్లా మక్తల్​లో రాష్ట్ర ప్రభుత్వం చేపడుతున్న ఆస్తుల నమోదు సర్వేను పాలనాధికారి హరిచందన ఆకస్మిక తనిఖీ నిర్వహించారు. పట్టణంలోని పలు వార్డుల్లో సర్వే చేపడుతున్న అధికారులకు ఆమె పలు సూచనలు చేశారు. ఉదయం ఆరు గంటలకే కేటాయించిన వార్డులకు చేరుకుని వివరాలు సేకరించాలని తెలిపారు. ఇంటి యజమానుల ఆధార్ సంఖ్య, ఇంటి విస్తరణ వివరాలను పకడ్బందీగా యాప్​లో నమోదు చేయాలన్నారు.

సర్వేలో ఏమైనా ఇబ్బందులు వస్తే ప్రత్యేక అధికారుల దృష్టికి తీసుకురావాలని సూచించారు. రోజుకు కచ్చితంగా 100 నుంచి 150 ఇండ్ల వివరాల సేకరణ పూర్తి చేయాలన్నారు. మక్తల్ మండలంలోని మద్వర్​లో నిర్మిస్తున్న రైతు వేదిక నిర్మాణ పనులను పరిశీలించారు. ఈ కార్యక్రమంలో ఆర్డీవో శ్రీనివాస్, పురపాలక కమిషనర్, తహాసీల్దార్, ఇతర అధికారులు పాల్గొన్నారు.

ఇదీ చదవండి:'వ్యవసాయేతర ఆస్తుల నమోదు సర్వే కట్టుదిట్టంగా జరగాలి'