దిశ హత్య కేసు నిందితుల ఎన్కౌంటర్పై జాతీయ మానవ హక్కుల కమిషన్ నిజనిర్ధరణ బృందం విచారణ కొనసాగుతున్న నేపథ్యంలో నిందితుల కుటుంబసభ్యులను తెల్లవారుజామున పోలీసులు హైదరాబాద్కు తరలించారు. నారాయణపేట జిల్లా జక్లేర్ గ్రామానికి చెందిన ప్రధాన నిందితుడు ఆరిఫ్ తండ్రి హుస్సేన్, గుడిగండ్లకు చెందిన చెన్నకేశవులు తండ్రి కురుమయ్య, నవీన్ తల్లి లక్ష్మి, శివ తండ్రి జొల్లు రాజప్పలను తెల్లవారుజామునే తీసుకెళ్లారు.
పోలీసులపై దాడి చేశారా?
జాతీయ మానవ హక్కుల కమిషన్ బృందం ఎదుట వీరిని హాజరుపరిచారు. శనివారం మహబూబ్నగర్లో మానవ హక్కుల కమిషన్ బృందం.. నిందితుల కుటుంబసభ్యులతో మాట్లాడుతుందని అంతా భావించారు. కానీ వారిని కలవకుండానే బృందం నగరానికి చేరుకుంది. పోలీసుల చర్యపై నిందితుల కుటుంబ సభ్యులు ఆగ్రహం వ్యక్తం చేస్తున్నారు. కోర్టు తీర్పు రాకుండానే పోలీసులు బూటకపు ఎన్కౌంటర్లో నిందితులను హతమార్చడం సరైంది కాదని అభిప్రాయపడ్డారు. నిస్సహాయ స్థితిలో ఉన్న నిందితులు పోలీసులపై ఎదురుదాడికి దిగారనటం హాస్యాస్పదమన్నారు. అర్థరాత్రి నిందితులను ఘటనా స్థలంలోకి తీసుకెళ్లి విచారణ చేయాల్సిన అవసరం ఏంటని ప్రశ్నించారు.
నిందితులందరినీ ఎన్కౌంటర్ చేయండి..
పోలీసులు సరిగ్గా విధులు నిర్వర్తించి ఉంటే ఐదు కుటుంబాలు రోడ్డున పడే దుస్థితి తలెత్తేది కాదని ఏ4 నిందితుడు చెన్నకేశవులు భార్య రేణుక ఆరోపించారు. మద్యం మహమ్మారి మూలంగానే ఘటన జరిగి తాను దిక్కుతోచని పరిస్థితిలోకి వెళ్లాల్సిన దుస్థితి నెలకొందని వాపోయారు. వెంటనే మద్యం నిషేధించాలని డిమాండ్ చేశారు. పోలీసులు వైఫల్యాన్ని కప్పిపుచ్చుకునేందుకే తన భర్తను ఎన్కౌంటర్లో చంపేశారని ఆరోపించారు. కోర్టులతో పని లేదనుకుంటే.. అత్యాచార కేసుల నిందితులందర్నీ ఎన్కౌంటర్ చేయాలని డిమాండ్ చేశారు. అనాథగా మారిన తనకు ప్రభుత్వ పెద్దలే న్యాయం చేయాలని కోరారు.
మృతదేహాలను అప్పగించండి..
తల్లిదండ్రులు లేని చెన్నకేశవులు భార్య ప్రస్తుతం నిండు గర్భిణి. చెన్నకేశవులు మృతితో భర్తను కోల్పోయి, తల్లిదండ్రులు లేక ఆమె అనాథగా మారిందని, పుట్టే బిడ్డ సైతం తండ్రి లేని బిడ్డ అవుతుందని కుటుంబ సభ్యులు కన్నీటి పర్యంతమయ్యారు. ఆమెకు పోలీసులు, ప్రభుత్వ పెద్దలు ఏం న్యాయం చేస్తారో చెప్పాలని కుటుంబ సభ్యులు డిమాండ్ చేశారు. వీలైనంత త్వరగా విచారణ ముగించి మృతదేహాలను అప్పగించాలని కోరారు.
అత్యాచార నిందితులందరినీ ఎన్కౌంటర్ చేయాలి ఇదీ చూడండి: ఎన్కౌంటర్ స్థలాన్ని పరిశీలించిన ఎన్‌హెచ్‌ఆర్సీ బృందం
