నాగార్జున సాగర్ ఉప ఎన్నికలో మాజీ మంత్రి జానారెడ్డికి పోటీ లేదని పీసీసీ అధ్యక్షుడు ఉత్తమ్ కుమార్‌ రెడ్డి అభిప్రాయం వ్యక్తం చేశారు. కాంగ్రెస్, తెరాస మధ్య పోరు కొనసాగుతుందని, భాజపా అసలు పోటీలోనే లేదని విమర్శించారు. జూమ్ యాప్‌ ద్వారా మండల స్థాయి నాయకులతో సమావేశమైన ఆయన నేతలకు దిశానిర్దేశం చేశారు. బయట కుస్తీ, లోపల దోస్తీతో తెరాస, భాజపాలు ప్రజలను మోసం చేస్తున్నాయని విమర్శించారు.
భాజపా ఎంపీ సోయం లంబాడీలను ఎస్టీ జాబితా నుంచి తొలగించాలని ప్రధాన మంత్రికి లేఖ రాశాడని తెలిపారు. ఈ విషయంలో భాజపా, తెరాసల వైఖరి ఏమిటో స్పష్టం చేయాలని డిమాండ్‌ చేశారు. కాంగ్రెస్ పార్టీ అధికారంలో ఉన్నప్పుడే లంబాడీలను ఎస్టీ జాబితాలో చేర్చామన్నారు. అందుకే లక్షలాది లంబాడీ బిడ్డలు విద్య, ఉద్యోగాల్లో గొప్ప వారు అయ్యారని అన్నారు. ఈ విషయాలను కాంగ్రెస్ నాయకులు, లంబాడా బిడ్డలకు అర్థమయ్యేలా చెప్పి పార్టీకి లాభం జరిగేలా చూడాలన్నారు.