Kishan Reddy Fires on KTR: మునుగోడు ఉపఎన్నికల ప్రచారంలో భాగంగా కేంద్రమంత్రి కిషన్ రెడ్డి చౌటుప్పల్ పురపాలిక పరిధిలోని లింగారెడ్డిగూడెంలో ప్రచారం నిర్వహించారు. ఈ సందర్భంగా కేసీఆర్పై తనదైన శైలిలో విమర్శల వర్షం కురిపించారు. 1200 మంది బలిదానంతో ఏర్పాటైన తెలంగాణలో తండ్రీకుమారుల కుటుంబ పాలన సాగుతుందని అన్నారు. ముఖ్యమంత్రి కేసీఆర్ ఎప్పుడు ఫామ్హౌజ్లోనే పడుకుంటున్నారని ఆరోపించారు. తెలంగాణ ప్రజలకు అవినీతి పాలన కావాలా.. ప్రజాస్వామ్య పాలన కావాలా.. అంటూ ప్రజలను ఉద్దేశించి మాట్లాడారు.
ఎన్నికలప్పుడే కేటీఆర్కు దత్తత గుర్తుకు వస్తుంది: కిషన్ రెడ్డి మంత్రి కేటీఆర్కు ఉప ఎన్నికలప్పుడే దత్తత గుర్తుకువస్తుందని.. మునుగోడును దత్తత తీసుకుంటామని అనడం చాలా హాస్యాస్పదంగా ఉందని ఎద్దేవా చేశారు. మునుగోడును కేటీఆర్ ఇంతవరకు పట్టించుకోకపోవడం చాలా బాధాకరమన్నారు. ఉట్టికి ఎగరలేని అమ్మ.. స్వర్గానికి ఎగురుతాను అన్నట్లు కేసీఆర్ తెరాసను భారాసగా ప్రకటించడం చాలా హాస్యాస్పదమని ఎద్దేవా చేశారు.
తెలంగాణలో భాజపా ప్రభుత్వం అధికారంలోకి వచ్చిన మొదటి రోజే మతపరమైన రిజర్వేషన్లు తీసివేస్తామని కిషన్రెడ్డి ప్రకటించారు. బంజారాలకు ప్రత్యేక రిజర్వేషన్లు అమలు చేస్తామని అన్నారు. మునుగోడు ప్రజలు పులిబిడ్డలని నిరూపించాలని.. అందరూ భాజపాకు ఓటు వేసి రాజగోపాల్రెడ్డిని గెలిపించాలని ఆయన కోరారు.
"అప్పుడు రాజగోపాల్రెడ్డి కూడా కాంగ్రెస్తో పోరాడి తెలంగాణ తీసుకురావడానికి ఎంతో చేశారు. ఎంతో మంది బలిదానం చేసుకుంటే వచ్చిన తెలంగాణను ఇప్పుడు కేసీఆర్ కుటుంబం 8 సంవత్సరాలుగా పాలిస్తోంది. అప్పుడు తెరాసకి ఓట్లు వేస్తే దళితులకు ముఖ్యమంతి స్థానంలో కూర్చోపెడతాం అన్నారు. ఆ మాట ఏం అయ్యింది. ఇప్పుడు మునుగోడు ఉపఎన్నిక వస్తే కేటీఆర్కు దత్తత గుర్తుకువస్తుంది. ఇన్ని రోజులు మునుగోడు గుర్తుకురాలేదా.. కేసీఆర్కి ప్రజల కష్టాలు కనపడవు.. ఎప్పుడూ ఫాంహౌజ్లోనే ఉంటారు".- కిషన్రెడ్డి, కేంద్ర మంత్రి
ఇవీ చదవండి:
