Nagarjuna sagar: సాగర్​కు తగ్గిన వరద.. క్రస్టు గేట్లు మూసివేత

నాగార్జున సాగర్(Nagarjuna sagar)​కు వరద తగ్గుముఖం పట్టింది. దీంతో ప్రాజెక్టు క్రస్టు గేట్లను అధికారులు పూర్తిగా మూసివేశారు. గత 12 రోజులుగా వరద ప్రవాహాన్ని బట్టి క్రస్టు గేట్లు ఎత్తి నీటిని విడుదల చేసిన అధికారులు.. వరద తగ్గడంతో వాటిని మూసివేశారు.

నాగార్జున సాగర్(Nagarjuna sagar) జలాశయానికి వరద తగ్గడంతో అధికారులు ప్రాజెక్టు క్రస్ట్ గేట్లను మూసివేశారు. వరద ప్రవాహాన్ని బట్టి ఈ నెల 1నుంచి క్రస్ట్ గేట్ల ద్వారా నీటి విడుదల కొనసాగుతూనే ఉంది. నిన్నటి వరకు 6 క్రస్ట్ గేట్లు ఎత్తి ఉండగా.. నేటి ఉదయం వరకు 2 గేట్ల ద్వారా నీటి విడుదల కొనసాగింది. ఎగువ నుంచి వరద నీరు తగ్గిపోవడంతో ఆ రెండు గేట్లను కూడా మూసి వేశారు.

ప్రాజెక్టుకు ప్రస్తుతం 50 వేల 904 క్యూసెక్కుల వరద వస్తుండగా అంతే మొత్తంలో ఔట్ ఫ్లో కొనసాగుతోంది. ప్రధాన విద్యుత్ ఉత్పత్తి కేంద్రం నుంచి 33వేల క్యూసెక్కులు, సాగర్ కుడి, ఎడమ కాల్వలకు కలిపి 15వేల క్యూసెక్కుల సాగునీటిని, ఏఎమ్మార్పీకి 2400 క్యూసెక్కులు, లో లెవెల్ కాల్వకు 500 క్యూసెక్కుల చొప్పున నీటిని విడుదల చేస్తున్నారు.

అటు సూర్యాపేట జిల్లా పులిచింతల ప్రాజెక్టు గేటు కొట్టుకుపోయిన ఘటనతో 45 టీఎంసీల్లో 40 టీఎంసీల నీరు దిగువకు విడుదలైంది. మళ్లీ ఇప్పుడిప్పుడే జలాశయానికి నీరు చేరుతోంది. సాగర్​ నుంచి వస్తున్న నీటితో ప్రస్తుతం పులిచింతల సగానికి పైగా నిండింది. జలాశయానికి ఇన్​ఫ్లో 42 వేల 335 క్యూసెక్కులు కాగా.. ఔట్​ఫ్లో 13 వేల 400గా ఉంది. ప్రాజెక్టు గరిష్ఠ నీటి నిల్వ సామర్థ్యం 45.77 టీఎంసీలు కాగా 27.60 టీఎంసీల నీరు నిల్వ ఉంది.

ఇదీ చదవండి:KRMB: కృష్ణా బోర్డు ఛైర్మన్‌కు రాష్ట్ర ప్రభుత్వం మరో లేఖ