నల్గొండ జిల్లా కేంద్రంలో శనివారం.. ఎమ్మెల్యే కంచర్ల భూపాల్రెడ్డి ఆధ్వర్యంలో ఏర్పాటు చేసిన మెగా జాబ్ మేళాకు విశేష స్పందన లభించింది. 60కిపైగా ప్రైవేటు కంపెనీలు పాల్గొన్న ఈ మేళాలో.. పెద్ద ఎత్తున నిరుద్యోగులు పాల్గొన్నారు. జిల్లా వ్యాప్తంగా దాదాపు 3 వేల మంది నిరుద్యోగ యువతీయువకులు తరలివచ్చారు. ముఖ్య అతిధిగా రాజ్యసభ సభ్యుడు బడుగు లింగయ్య యాదవ్ పాల్గొని జ్యోతి ప్రజ్వలన చేసి కార్యక్రమాన్ని ప్రారంభించారు.
1000 నుంచి 1500 మంది నిరుద్యోగులకు ఉద్యోగ అవకాశాలు కల్పించాలనే ఉద్దేశంతో ఈ జాబ్ మేళా చేపట్టామని.. ఎమ్మల్యే కంచర్ల భూపాల్ రెడ్డి తెలిపారు. జిల్లాలో నిరుద్యోగ సమస్య పరిష్కారానికి తనవంతు కృషి చేస్తున్నట్లు పేర్కొన్నారు. కొన్ని ప్రైవేట్ కంపెనీలతో మాట్లాడి ఈ కార్యక్రమం ఏర్పాటు చేసినట్లు వెల్లడించారు. త్వరలోనే రాష్ట్రంలో 50వేల ఉద్యోగాలకు సీఎం కేసీఆర్.. నోటిఫికేషన్ వేయనున్నారని స్పష్టం చేశారు.
నిరుద్యోగులకు అండగా మెగా జాబ్ మేళా నిర్వహించడం.. అభినందనీయం. ఉద్యోగ కల్పన విషయంలో ఐటీ శాఖ మంత్రి కేటీఆర్ను స్ఫూర్తిగా తీసుకొని.. ఎమ్మెల్యే ఈ కార్యక్రమం నిర్వహించడం పట్ల ఆనందంగా ఉంది. -బడుగు లింగయ్య యాదవ్, రాజ్యసభ సభ్యుడు