అన్నదాతలను అవస్థలకు గురిచేస్తున్న సన్నరకం సాగు

సన్నరకం సాగు అన్నదాతలను అవస్థలకు గురిచేస్తోంది. నియంత్రిత విధానం వారికి ఆవేదనే మిగులుస్తోంది. సన్నాల సాగును మొదట ప్రోత్సహించిన ప్రభుత్వం.. ఇప్పుడు మద్దతు ధర కల్పించటకపోవటం వల్ల అన్నదాతలు ఆందోళనకు గురవుతున్నారు. గతంతో పోల్చితే పెరిగిన పెట్టుబడులకు తోడు.. సన్నాల కొనుగోళ్లకు మిల్లర్లు కూడా ఆసక్తి చూపకపోవడం వల్ల రైతులకు కొత్త సమస్యలు వచ్చిపడుతున్నాయి.

రైతులు ఆరుగాలం కష్టపడి పండించిన పంట చేతికొచ్చాక అమ్ముకోవటంలో ఇబ్బందులు మాత్రం తప్పటంలేదు. తెగుళ్లను, ప్రకృతి విపత్తులను ఎదుర్కొని.... తీరా విక్రయించే సమయంలో ఆశలు ఆవిరవుతున్నాయి. రాష్ట్రవ్యాప్తంగా గతంలో సన్న రకాల సాగు తక్కువగా ఉన్నందున... డిమాండ్ కూడా తక్కువగా ఉండేది. ప్రభుత్వం నియంత్రిత పంటల సాగు విధానంతో సన్నరకాలను రైతులు పెద్ద ఎత్తున సాగుచేశారు. ఈ పరిస్థితుల్లో దొడ్డు రకాలతో పోల్చితే.. సన్నాలకు మార్కెట్లో డిమాండ్ తగ్గే పరిస్థితి నెలకొంది. క్వింటాల్‌ సన్నరకానికి గతంలో 2 వేల నుంచి 22వందల వరకు ధరలు పలికేది. కొనుగోలు కేంద్రాల ద్వారా ప్రభుత్వం కొనుగోలు చేయకున్నా.... 2 వేలకు పైగా చెల్లించి నేరుగా మిల్లర్లే ఖరీదు చేసేవారు. కానీ ఈ సీజన్​లో పెరిగిన సాగుతో... ధర మాత్రం బాగా తగ్గిపోయింది. దొడ్డురకంలో 'ఏ' గ్రేడ్ రకానికి 1,888 రూపాయలు... సాధారణ రకానికి 1,868 మద్దతు ధర చెల్లించాలని ఉంది. అయినా దొడ్డు రకానికున్న మద్దతు ధరనే... సన్నాలకు చెల్లించాలని చెప్పడం వల్ల సాగుదారులు నోరెళ్లబెడుతున్నారు.

రైతుల పరిస్థితి దయనీయం

సన్నాలు సాగు చేయాలని రాష్ట్ర ప్రభుత్వం స్పష్టంగా ఆదేశాలిచ్చినా... దానికి ప్రత్యేక మద్దతు ధర అంటూ ఏమీ నిర్ణయించలేదు. వాటిని కొనుగోలు చేయాలని కూడా... ఇప్పటివరకు ఎలాంటి ఆదేశాలు జారీకాలేదు. దీంతో ఉమ్మడి నల్గొండ జిల్లాలో రైతుల పరిస్థితి మరింత దయనీయంగా మారింది. బియ్యపు మిల్లులకు నిలయమైన మిర్యాలగూడలో... వంద పెద్ద మిల్లులు, మరో 80 చిన్న మిల్లులున్నాయి. ఇక్కడి మిల్లుల్లో నిత్యం 13 వందల ట్రాక్టర్ల వరకు కొంటుంటారు. కానీ, ప్రస్తుతం పెరిగిన సాగుతో... రోజుకు 2 నుంచి 3 వేల వరకు ట్రాక్టర్లు వస్తుండగా... మిల్లర్లు పేచీ పెడుతున్నారు. భారీస్థాయిలో కొనలేమని.. తక్కువ ధరకు ఇస్తే ఆలోచిస్తామని తెల్చిచెబుతున్నారు. ఈ పరిస్థితిల్లో శుక్రవారం రాత్రి అద్దంకి-నార్కట్ పల్లి రహదారిపై శెట్టిపాలెం వద్ద రైతులు ఆందోళనకు దిగారు. గతానికి భిన్నంగా క్వింటాల్‌కు నాలుగైదు వందలు తగ్గుతుండటం పట్ల... సాగుదారులు ఆవేదన వ్యక్తం చేస్తున్నారు.

దోమపోటుతో రైతన్న దిగాలు..

రాష్ట్రవ్యాప్తంగానూ సన్నరకం సాగుతో విక్రయ సమస్యలతో పాటు.... తెగులు కూడా అవస్థలకు గురిచేస్తోంది. కామారెడ్డి జిల్లా దోమకొండలోని ధాన్యం కొనుగోలు కేంద్రం వద్ద రైతులు ఆందోళనకు దిగారు. ప్రభుత్వ సూచన మేరకు సాగుచేసినా... భారీ వర్షాలతో దోమపోటు మరింత దెబ్బతీసిందని వాపోయారు. మెదక్ జిల్లా పాతూర్‌లో నాగరాజు అనే రైతు తన ఎకరం సన్నరకం వరిపంటకు నిప్పుపెట్టాడు. పంట బాగా ఎదిగినా... ఈనే దశలో దోమపోటు దెబ్బతీసిందని బాధితుడు వాపోయాడు. జగిత్యాల జిల్లా వేములకుర్తికి చెందిన శ్రీధర్ అనే రైతు నాలుగు ఎకరాల సన్నరకం వరి పంటకు నిప్పు పెట్టాడు. పంటకు పూర్తిగా దోమపోటు సోకడంతో పాటు ఇటీవల వర్షాలకు ధాన్యం నేలరాలింది. దీంతో ఆవేదనకు గురైన రైతు.. నిప్పంటించాడు. ఇదే జిల్లా కథలాపూర్ మండలం పెగ్గర్లలో తిరుపతి అనే రైతుకు చెందిన రెండున్నర ఎకరాల సన్న రకం వరి పంట దోమపోటుతో పూర్తిగా దెబ్బతిన్నది. దీంతో చేసేదేమిలేక పంటను తగలబెట్టాడు.

మద్దతు ధర ప్రకటించాలి

ప్రభుత్వం దొడ్డు రకం మాదిరిగానే సన్నరకం వరి ధాన్యానికి మద్దతు ధరను ప్రకటించాలని రైతులు కోరుతున్నారు. వెంటనే ప్రత్యేక కొనుగోలు కేంద్రాలను ఏర్పాటు చేసి... దళారుల చేతిలో మోసపోకుండా చర్యలు చేపట్టాలని అన్నదాతలు కోరుతున్నారు.

ఇవీ చూడండి:రైతులంతా ఏకమై పంటకు ధర నిర్ణయించుకోవాలి: కేసీఆర్​