ఓటర్లకు డబ్బుల పంచుతున్నాడని కాంగ్రెస్ కార్యకర్త అరెస్ట్

సాగర్​ ఉప ఎన్నికల ప్రచారం ఇలా ముగిసిందో లేదో అప్పుడే డబ్బుల పంపిణీ మొదలయిందనే వార్తలు చక్కర్లు కొడుతున్నాయి. పోలీసులు.. అనుమానం వచ్చిన నేతలు, పార్టీల మద్దతుదారుల ఇళ్లలో తనిఖీలు చేస్తున్నారు. ఇలాగే ఉట్కూరు గ్రామంలో ఓటర్లకు డబ్బులు పంచుతున్నారన్న సమాచారంతో వారు ఓ కాంగ్రెస్​ కార్యకర్తను అదుపులోకి తీసుకున్నారు.

సాగర్ ఉప ఎన్నికల పోలింగ్​కు ముందు.. నిడమనూరు మండలం ఉట్కూరులో డబ్బుల పంపిణీ ఘటన కలకలం రేపింది. ఓటర్లను ప్రలోభాలకు గురి చేస్తున్నారనే సమాచారంతో రంగంలోకి దిగిన పోలీసులు కాంగ్రెస్​ మాజీ సర్పంచ్​ కృష్ణయ్యను అదుపులోకి తీసుకున్నారు. అతని వద్ద నుంచి రూ. 43 వేలను స్వాధీనం చేసుకున్నారు.

విషయం తెలుసుకున్న కాంగ్రెస్ నాయకులు పీఎస్​కు చేరుకుని పోలీసులతో వాగ్వాదానికి దిగారు. తాము ఎవరికీ డబ్బులు ఇవ్వలేదని కృష్ణయ్య తెలిపారు. అవి తన డబ్బులేనంటూ వివరణ ఇవ్వగా.. పోలీసులు అతనిని వదిలేశారు. విచారణ అనంతరం డబ్బులు తిరిగిస్తామని తెలిపారు.

ఇదీ చదవండి:మంత్రి ఈటల కాన్వాయ్​ను అడ్డుకున్న ఏబీవీపీ కార్యకర్తలు