ఆ ఊర్లో బడి.. బస్టాండు... శ్మశానం పక్కపక్కనే

శ్మశానవాటిక అంటే ఊరి చివర్లో ఉండాలి. జనావాసాల మధ్య ఉంటే ప్రజలకు ఇబ్బందులు తప్పవు. కానీ బడి పక్కనే ఉంటే పిల్లలకు నిజంగా పరీక్షే. ఊర్లో ఎవరైనా చనిపోతే.. ఆ విద్యార్థులు భయంతో వణికిపోతారు.

నల్గొండ జిల్లా మర్రిగూడ మండల కేంద్రంలో జిల్లా పరిషత్ ఉన్నత పాఠశాల పక్కనే శ్మశాన వాటిక ఉంది. ఎవరైనా చనిపోయి, శ్మశానవాటికకు తీసుకొస్తే ఆ రోజు పాఠాలు చెట్లకిందనే. తరగతి గది కిటికీ తీస్తే... ఆ దృశ్యాలే కనిపిస్తాయి. ఏడుపులు, డప్పు చప్పుళ్లకు పిల్లలు వణికిపోతున్నారు. నిద్రలోనూ కలవరిస్తున్నారు. శవాన్ని దహనం చేస్తున్నప్పుడు వచ్చే పొగతో విద్యార్థులు, ఉపాధ్యాయులు అస్వస్థతకు గురవుతున్నారు.

శ్మశానానికి పక్కనే బస్టాండు కూడా ఉంది. అక్కడికి వచ్చే ప్రయాణికులు కూడా తీవ్ర ఇబ్బందులు ఎదుర్కొంటున్నారు. చుట్టుపక్కల వాళ్లు ఆ రోజంతా బయటకు రాలేని పరిస్థితి. ఇక్కడి నుంచి తరలించాలని శాసనసభ్యునికి ఎన్నిసార్లు ఫిర్యాదు చేసినా... ఫలితం లేకుండా పోయిందని గ్రామస్థులు వాపోయారు. పైగా శ్మశానంలో వసతులు కల్పిస్తూ... అభివృద్ధి చేస్తున్నారని విద్యార్థులు, స్థానికులు ఆవేదన వ్యక్తం చేస్తున్నారు.

ఇదీ చూడండి: గాడిదల పెళ్లికి ఊరి పెద్దల హడావుడి!