రోడ్డుపక్కనే ప్రసవించిన మహిళ.. ఆసుపత్రికి తరలించిన యువకులు

వైద్య పరీక్షలకు ఆసుపత్రికి వెళుతున్న ఓ గర్భిణీ రోడ్డు పక్కనే ప్రసవించింది. గమనించిన స్థానిక యువకులు సదరు మహిళను ఆసుపత్రికి తరలించారు. ప్రస్తుతం తల్లీ, బిడ్డ క్షేమంగా ఉన్నారు. ఈ ఘటన నాగర్​కర్నూల్​ జిల్లాలో చోటుచేసుకుంది.

నాగర్​కర్నూల్​ జిల్లా పెద్దకొత్తపల్లి మండలం కల్వకోల్ గ్రామానికి చెందిన పూజారి రాధ అనే గర్భిణీ వైద్య పరీక్షల నిమిత్తం కుటుంబ సభ్యులతో కలిసి శనివారం కొల్లాపూర్ ఆసుపత్రికి బయలుదేరింది. కల్వకోలు-కొల్లాపూర్​ మార్గమధ్యలో నొప్పులు రావడం వల్ల రోడ్డుపక్కనే ప్రసవించింది. విషయం తెలుసుకున్న కల్వకోలు గ్రామానికి చెందిన యువకులు మురళీమోహన్, గిరి ప్రసాద్, సోమిశెట్టి ప్రదీప్, వెంకటేశులు ప్రసవమైన మహిళకు అండగా నిలిచారు. కొల్లాపూర్ ఆసుపత్రికి తరలించారు.

విషయం తెలుసుకున్న ఎమ్మెల్యే బీరం హర్షవర్ధన్​రెడ్డి మహిళకు మెరుగైన చికిత్స అందించాలని వైద్యులకు సూచించారు. ప్రస్తుతం తల్లీ, బిడ్డ ఆరోగ్యంగా ఉన్నట్లు వైద్యులు తెలిపారు.

ఇదీచూడండి.. పక్కదారి పడుతున్న రేషన్​ బియ్యం.. పట్టుకున్న పోలీసులు