రైతు సమస్యల పరిష్కారానికి రెవెన్యూ దర్బార్​

రైతులు పడుతున్న అవస్థలను తీర్చేందుకు ఎమ్మెల్యే మర్రి జనార్దన్​రెడ్డి నడుం బిగించారు. రెవెన్యూ దర్బార్​ పేరిట వినూత్న కార్యక్రమానికి శ్రీకారం చుట్టారు. ఇక నుంచి గ్రామాల్లో సభలు నిర్వహించి అక్కడికక్కడే సమస్యలను పరిష్కరిస్తామని హామీ ఇచ్చారు.

రైతులు పొలాల్లో ఉండాలి లేకుంటే ఇంట్లో ఉండాలి అంతేగాని ప్రభుత్వ కార్యాలయాల చుట్టు నిత్యం ప్రదక్షిణలు చేసే పరిస్థితి మారాలని నాగర్​కర్నూల్​ శాసన సభ్యుడు మర్రి జనార్దన్​రెడ్డి ఆకాంక్షించారు. రైతుల సమస్యలు పరిష్కరించేందుకు రెవెన్యూ దర్బార్​కు శ్రీకారం చుట్టారు. తాడురు మండలంలో సంయక్త కలెక్టర్​, ఇతర రెవెన్యూ అధికారుల ఆధ్వర్యంలో రైతుల సమస్యలు పరిష్కరించే ప్రయత్నం చేశారు. ప్రతి గ్రామంలో సభలు నిర్వహించి కర్షకుల సమస్యల పరిష్కారనికై చర్యలు తీసుకుంటామని హామీ ఇచ్చారు.

రైతుల సమస్యలు, పాసు పుస్తకాల జారీలో ఇబ్బందులను అధిగమించేందుకు రెవెన్యూ సిబ్బంది కృషిచేస్తారని సంయుక్త కలెక్టర్​ శ్రీనివాస్​ రెడ్డి తెలిపారు.

ప్రభుత్వ కార్యాలయాల చుట్టూ ఎంత తిరిగినా సమస్యలు పరిష్కారం కావడం లేదని రైతులు ఆవేదన వ్యక్తం చేశారు. పాసు పుస్తకాలు రాలేదని ఫలితంగా రైతు బంధు నగదు జమకాలేదని వాపోయారు. రెవెన్యూ దర్బార్​ కార్యక్రమంతోనైనా తమ సమస్యలు పరిష్కారం కావాలన్నారు.

ఇవీ చూడండి: నేడే కొలువుదీరనున్న కొత్త పాలక మండళ్లు