అధికారులను, సర్పంచ్​లను ఎందుకు సస్పెండ్​ చేయొద్దు..?: కలెక్టర్

ఇంత గలీజ్​గా ఉంచుకుంటే ఊరు ఎప్పుడు డెవలప్ అయితది..? మీ గ్రామం మీ వీధులు ఇలాగేనా ఉంచుకునేది..? ఎన్ని రోజులైంది కాలువలు శుభ్రం చేయక..? అని నాయకులు, అధికారులపై జిల్లా కలెక్టర్ శర్మన్ చౌహన్ ఆగ్రహం వ్యక్తం చేశారు.

నాగర్​కర్నూల్ జిల్లా తిమ్మాజీపేట మండలంలో కలెక్టర్ ఎల్ శర్మాన్ చౌహాన్ పర్యటించారు. హరితహారం, రైతు వేదిక నిర్మాణాలు, డంపింగ్ యార్డు, వైకుంఠధామాలు, పారిశుద్ధ్య పనులు పరిశీలించారు. ఆవంచ, మారేపల్లి, ఇప్పలపల్లిలో రైతు వేదిక నిర్మాణ పనులు చేపట్టలేదని సర్పంచ్​లపై ఆగ్రహం వ్యక్తం చేశారు. మీకు చేతనైతే చేయండి లేకపోతే కాంట్రాక్టర్​తో పని చేయించండి. కానీ సాకులు చెప్పొద్దని అసహనం వ్యక్తం చేశారు.

పోతిరెడ్డిపల్లి, మారేపల్లి, గుమ్మకొండలో వీధులు, మురుగు కాలువలు, శివార్లను పరిశీలించారు. పేరుకుపోయిన మట్టిని కట్టె పుల్ల పెట్టి ఎంత పేరుకోపోయిందో పరిశీలించారు. ఇంత దరిద్రంగా గ్రామాలుంటే... ఎందుకు అధికారులను, సర్పంచ్​లను సస్పెండ్​ చేయొద్దని ప్రశ్నించారు. రెండు రోజుల్లో గ్రామాలన్నీ శుభ్రం కావాలని ఆదేశించారు. లేకుంటే కఠిన చర్యలు తప్పవని హెచ్చరించారు.