ఆధునిక పద్ధతిలో పంటల సాగు... లాభాలు బహుబాగు

ఆ ఊర్లో రైతులకు కావాల్సినంత భూమి ఉంది. నీటి వనరులు మాత్రం అంతంతమాత్రంగానే ఉన్నాయి. తక్కువ నీటితో పండే పంటలను సాగు చేసి మంచి ఆదాయం పొందాలని నిశ్చయించుకున్నారు. ఈ ప్రయత్నానికి శ్రీకారం చుట్టిన తమ గ్రామ రైతు మంచి లాభాలు పొందటం వల్ల ఊరంతా ఆయన్నే అనుసరించారు. మార్కెట్ల్​లో డిమాండ్​ ఉన్న ఉద్యాన పంటలను సాగు చేస్తూ... లాభాలు గడిస్తున్నారు.

ఆధునిక పద్ధతిలో విభిన్నమైన తోటలను సాగుచేస్తూ.. ఆదర్శంగా నిలుస్తున్నారు నాగర్​కర్నూల్​ జిల్లా కల్వకుర్తి మండలం ముకురాల గ్రామ రైతులు. భూమి ఉన్నా... నీటి వనరులు సరిగా లేకపోవటం వల్ల తక్కువ నీటితో లాభాలు గడించే పంటలు వేసి లాభాలు గడిస్తున్నారు. గ్రామంలో రైతులు దశాబ్దకాలంగా బొప్పాయి సాగు చేస్తూ మంచి దిగుబడి సాధిస్తున్నారు. గ్రామంలో 150 ఎకరాలకు పైగా బొప్పాయి పంట సాగు చేస్తున్నారంటే.. రైతులు ఎంతగా రాణిస్తున్నారో అర్థం చేసుకోవచ్చు. ఈ పంటలో ఆశించిన లాభాలు రావడం వల్ల ఇతర తోటల సాగునూ రైతులు ప్రారంభించారు.

ఉద్యాన పంటలకు శ్రీకారం...

గ్రామానికి చెందిన రాజేందర్ రెడ్డి అనే రైతు తనకున్న 10 ఎకరాల భూమిలో పందిరి ఏర్పాటు చేశారు. అందులో కాకర, బీర, చిక్కుడు వంటి పంటలు పండిస్తున్నారు. వీటితో పాటు అదనంగా తన పొలంలోనే కొలను నిర్మించి చేపల పెంపకం, నాటు కోళ్ల పెంపకం చేపట్టాడు. పక్కనే ఉన్న పలువురు రైతుల భూమిని కౌలుకు తీసుకొని సుమారు 23 ఎకరాల్లో బొప్పాయి సాగు చేశాడు. ఎకరాకు సుమారు రూ 1.5 లక్షల వరకు పెట్టుబడి పెట్టి సాగు చేస్తున్నాడు. ఈ సారి కొవిడ్ వల్ల బొప్పాయికి కాస్త గిరాకీ తగ్గిందని... సాధారణ రోజుల్లో మంచి ఆదాయం వస్తుందని రాజేందర్​రెడ్డి చెబుతున్నాడు.

మండలంలోనే మొదటగా...

రాజేందర్ రెడ్డిని చూసి ఇతర రైతులు కూడా ఇదే పద్ధతి అనుసరిస్తున్నారు. మామిడి, జామ, డ్రాగన్​ఫ్రూట్, అరటి వంటి తోటలను సాగుచేస్తున్నారు. రైతులంతా బిందు సేద్యం పరికరాలను వాడటం వల్ల తక్కువ నీటితో ఎక్కువ విస్తీర్ణంలో సాగు చేయగలుగుతున్నారు. రాంరెడ్డి, నర్సిరెడ్డి అనే ఇద్దరు రైతులు తక్కువ నీటితో సాగు చేసే డ్రాగన్ ఫ్రూట్ పంటను రెండున్నర ఎకరాల్లో సాగు చేశారు. మండలంలోనే మొట్టమొదటిసారిగా డ్రాగన్​ ఫ్రూట్​ పండించిన రైతులుగా గుర్తింపు పొందారు.

అధికారుల దృష్టికి సమస్యలు...

పండ్ల తోటలు సాగు చేసే రైతులు ముందుగానే దరఖాస్తు చేసుకుంటే వారికి తగిన విధంగా రాయితీని అందించేందుకు కృషి చేస్తున్నట్లు మండల ఉద్యాన శాఖ అధికారిణి ఇమ్రానా తెలిపారు. కొన్ని రకాల పండ్ల తోటలకు ప్రభుత్వం రాయితీ అందించడం లేదని... ఈ సమస్యను అధిగమించేందుకు పైఅధికారుల దృష్టికి తీసుకెళ్లినట్లు తెలిపారు.

మార్కెట్లో ఉన్న డిమాండ్​ను బట్టి పంటల సాగును చేపట్టి ముకురాల రైతులు అధిక లాభాలు పొందుతున్నారు. వారికున్న భూమితో పాటు మరికొంత భూమిని కౌలుకు తీసుకుని ఉద్యాన పంటలు సాగు చేస్తూ... తోటి రైతులకు ఆదర్శంగా నిలుస్తున్నారు.

ఇదీ చూడండి:'వచ్చేది భాజపా ప్రభుత్వమే... అందరి గుట్టు రట్టు చేస్తాం'