Deer destroying crops : వామ్మో జింకలు.. ఆందోళనలో అన్నదాతలు

Deer destroying crops: చెంగుచెంగున ఎగురుతూ... పరుగులు తీసే జింకలను చూస్తే ఎవరికైనా ఆనందమే. పిల్లల నుంచి పెద్దలదాకా అందరూ కేరింతలు కొడతారు. ఒక్కసారైనా ఆ జింకల గంతులను చూడాలని అనుకుంటారు. కానీ అక్కడివారు మాత్రం జింకలను వస్తున్నాయంటే చాలు భయపడుతున్నారు. ఆరుగాలం కష్టపడి సాగుచేసుకుంటున్న పంటలు పాడవుతున్నాయని ఆవేదన వ్యక్తం చేస్తున్నారు. అధికారులు తక్షణమే స్పందించి... వాటిని నియంత్రించాలని వేడుకుంటున్నారు.

Deer destroying crops : నాగర్ కర్నూల్, వనపర్తి జిల్లాలోని కొల్లాపూర్ నియోజకవర్గంలోని రైతులకు జింకలు కంటిమీద కునుకులేకుండా చేస్తున్నాయి. చిన్నం బావి మండలంలో వెల్లుటూర్, చిన్నమారు, అయ్యవారిపల్లి, కాలూరు, చెల్లేపాడు, గూడెం, పెద్దమార్ గ్రామాల్లో జింకలు పంటలు నాశనం చేస్తున్నాయని రైతులు వాపోతున్నారు. నాగర్ కర్నూల్ జిల్లా కొల్లాపూర్ మండలం మొల్లచింతపల్లి, ముక్కిడిగుండం, మంచాలకట్ట, పెద్దకొత్తపల్లి మండలం మారేడుమాన్​దిన్నే గ్రామాల్లోనూ ఇదే పరిస్థితి. జింకలు పొలాల్లో గుంపులుగా తిరుగుతుండటం వల్ల పంట దెబ్బతింటోందని అన్నదాతలు ఆవేదన వ్యక్తం చేస్తున్నారు.

జింకలకు ఆహారంగా పంటలు

farmers worry about crops : ఒకప్పుడు పదుల సంఖ్యలో ఉన్న కృష్ణ జింకలు... ఇప్పుడు వేలల్లో అయ్యాయి. గ్రామాల శివార్లలో గొర్రెల మందలను తలపించేలా తిరుగుతున్నాయి. ఉదయం నుంచి సాయంత్రం వరకు ఎక్కడ చూసినా గుంపులు గుంపులుగా సంచరిస్తున్నాయి. మందలాగా వచ్చి కంది, ఆముదం, వరి, మినుముల పంటలను... మొక్క దశలోనే తినేస్తున్నాయని రైతులు ఆవేదన వ్యక్తం చేస్తున్నారు. పంట వేసినప్పటి నుంచి కోతకోసే వరకు పొలాల వద్ద రేయింబవళ్లు కాపలా ఉండాల్సి వస్తోందని వాపోయారు. ఈ ఏడాది సాగు చేసిన పంటల్లో సగం వరకు జింకలకే ఆహారంగా మారాయని పేర్కొన్నారు.

మా దగ్గర జింకలు గొర్రెల మందలను తలపిస్తున్నాయి. ఏ పంట వేసినా నాశనం చేస్తున్నాయి. కాస్త పెద్ద మొక్కగా మారే వరకూ కాపాడుకుంటూ వచ్చినా తింటున్నాయి. వేల ఎకరాల విస్తీర్ణంలో ఇవి సంచరిస్తూ... పంటలను తినేస్తున్నాయి. పెట్టుబడి కూడా వచ్చేలా లేదు.

-చిన్నారెడ్డి, రైతు

నేను 5 ఎకరాల్లో కందులు వేశాను. కంది, పత్తి చేన్లలో జింకల మందలు దాడి చేయడంతో నాశనమవుతున్నాయి. రెండు, మూడు సార్లు విత్తనాలు వేసినా తినేస్తున్నాయి. అధికారులకు ఎన్ని సార్లు చెప్పినా పట్టించుకోవడం లేదు. ఇప్పటికైనా స్పందించి వాటిని నియంత్రించేందుకు ఏర్పాట్లు చేయాలి. తక్షణమే వాటికోసం ప్రత్యేక స్థలం కేటాయించాలి.

-డేగ శేఖర్, రైతు

వెలుటూర్ గ్రామంలో నేను మూడు ఎకరాల్లో మినుములు, శెనగ పంట వేశాను. జింకల బెడద ఎక్కువ ఉంది. వాటివల్ల పంటనష్టం జరుగుతోంది. అసలే వర్షాలు వచ్చి నష్టం వాటిల్లింది. దీనికి తోడు జింకలు పంటను నష్టం చేయడంతో ఇంకా నష్ట పోవాల్సివస్తోంది.

-నర్సింహా, రైతు

నదితీర ప్రాంతాల్లో అడవి జంతువులు ఎక్కువ వస్తుంటాయి. చినంబావి మండలంలోని వెలుటూరు, చిన్నమారుర్, చెల్లెపాడు తీరప్రాంతలో జింకలు ఎక్కువగా ఉన్నాయి. సమీపంలో ఉన్న పంటలను నాశనం చేస్తున్నాయి. నాగర్ కర్నూల్ జిల్లా, వనపర్తి పరిధిలో ఉన్నాయి. కావునా వనపర్తి జిల్లా రేంజర్ రామకృష్ణతో చర్చించి... చర్యలు తీసుకుంటాం.

-ఎల్లప్ప, రేంజ్ అధికారి

చర్యలు తీసుకోండి..

అసలే అకాల వర్షాల వల్ల రైతులు నష్టపోతున్నారని... మళ్లీ ఈ జింకల బెడద తీవ్ర నష్టం చేస్తోందని రైతులు వాపోతున్నారు. సాగు చేయాలంటేనే భయపడాల్సిన పరిస్థితి వచ్చిందని అంటున్నారు. ఇప్పటికైనా అధికారులు స్పందించి... వాటిని నియంత్రించేందుకు చర్యలు తీసుకోవాలని కోరుతున్నారు. జింకల కోసం ప్రత్యేకంగా స్థలం కేటాయించి పార్కులను ఏర్పాటు చేయాలని విజ్ఞప్తి చేస్తున్నారు.

ఇదీ చదవండి:TSRTC employees Retirement : పదవీ విరమణ సమయం ఆసన్నమైనట్టేనా..?