'మేడారం పనుల్లో నిర్లక్ష్యం వహిస్తే కఠిన చర్యలే'

ములుగు జిల్లా తాడ్వాయి మండలం మేడారంలో నాణ్యతా లోపాలతో జరిగిన ఊరట్టం-కన్నెపల్లి రోడ్డును ములుగు జిల్లా ఇంఛార్జి కలెక్టర్ వాసం వెంకటేశ్వర్లు పరిశీలించారు. ఈనాడు-ఈటీవీ భారత్​ ప్రచురించిన మేడారం పనులు తారుమారు కథనంపై స్పందించిన జిల్లా పాలనాధికారి స్వయంగా... క్షేత్రస్థాయి తనిఖీ చేపట్టారు. పనుల్లో నాణ్యత పాటించని గుత్తేదారుల బిల్లు నిలిపివేయాలని అధికారులను ఆదేశించారు.

మేడారం జాతర పనులను నాణ్యతలేమిపై పరిశీలనకు ఇంఛార్జి కలెక్టర్ వాసం వెంకటేశ్వర్లు క్షేత్రస్థాయిలో పర్యటించారు. కన్నెపల్లి-ఊరట్టం రోడ్డును పరిశీలించిన పాలనాధికారి పంచాయతీరాజ్ శాఖ ఇంజనీర్లపై ఆగ్రహం వ్యక్తం చేశారు. ఏఈ రమేశ్​ను సస్పెండ్ చేశారు. డీఈ రవీందర్, ఈఈ రాంబాబులకు సంజాయిషీ నోటీసులు జారీ చేశారు.

తాత్కాలిక పనులతోపాటు, శాశ్వత నిర్మాణంలోనూ నాణ్యతలేని మెటల్ వేస్తుండటాన్ని ఈనాడు-ఈటీవీ భారత్​ వెలుగులోకి తీసుకొచ్చింది. ఈ నెల 9న ఈనాడు-ఈటీవీ భారత్​ ప్రచురించిన 'మేడారం పనులు తారుమారు' కథనంపై స్పందించిన కలెక్టర్ స్వయంగా క్షేత్రస్థాయి తనిఖీ చేపట్టారు.

కన్నెపల్లి రోడ్డు గుత్తేదారులకు బిల్లులు నిలిపివేయాలని, ఇప్పటికే బిల్లులు చెల్లించి ఉంటే రికవర్ చేపట్టాలని ఆదేశించారు. మరుగుదొడ్ల నిర్మాణంతో పాటు పలు తాత్కాలిక నిర్మాణాలు పరిశీలించారు. నాసిరకంగా ఉన్న వాటిని తొలగించి తిరిగి నిర్మించాలని ఆదేశించారు.

పనుల నాణ్యతను పరిశీలించేందుకు విజిలెన్స్ విభాగాన్ని ఏర్పాటు చేసినట్లు కలెక్టర్ తెలిపారు. మేడారం జాతర పనులను అంకితభావంతో చేపట్టాలని, నిర్లక్ష్యం, నాణ్యత లేమితో చేస్తే కఠిన చర్యలు తీసుకుంటామని హెచ్చరించారు.

• ఇదీ చూడండి : ఈటీవీ భారత్​ ఎఫెక్ట్: మేడారం పనుల్లో నిర్లక్ష్యం కథనానికి స్పందన