మేడ్చల్​ జిల్లాలో కేంద్ర మంత్రి కిషన్​రెడ్డి రోడ్​షో

పురపాలక ఎన్నికల ప్రచారంలో భాగంగా మేడ్చల్​ జిల్లాలో కేంద్ర మంత్రి కిషన్​రెడ్డి రోడ్​ షో నిర్వహించారు. భాజపా అభ్యర్థులకే ఓటు వేసి గెలిపించాలని విజ్ఞప్తి చేశారు.

రాష్ట్రంలో ముఖ్యమంత్రి కేసీఆర్​ విచిత్రమైన పరిపాలన కొనసాగిస్తున్నారని కేంద్ర హోంశాఖ సహాయమంత్రి కిషన్​రెడ్డి పేర్కొన్నారు. పురపాలక ఎన్నికల ప్రచారంలో భాగంగా పార్టీ అభ్యర్థులతో కలిసి మేడ్చల్‌ జిల్లాలోని పోచారం, పీర్జాదిగూడ, బోడుప్పల్‌లో శనివారం ఆయన రోడ్​షో నిర్వహించారు.

సమస్యల గురించి వివరించడానికి కార్మికులు, మహిళలు, ఎంపీలు, ఎమ్మెల్యేలు ముఖ్యమంత్రి వద్దకు వెళితే దర్శన భాగ్యం కూడా కల్పించడం లేదని కిషన్​రెడ్డి ఆరోపించారు. ఎప్పుడు ఎక్కడుంటారో.. ఏం చేస్తారో.. ఏ నిర్ణయం తీసుకుంటారో తెలియని విచిత్ర ముఖ్యమంత్రి ఉన్నందుకు బాధపడుతున్నామన్నారు.

పుర పాలికలకు కేంద్ర నుంచే నిధులు వస్తున్నాయని.. పట్టణాలను అభివృద్ధి చేసుకోవాలంటే భాజపాకు ఓటు వేయాలని ఆయన విజ్ఞప్తి చేశారు. కొత్తగా ఏర్పాటైన పురపాలికలు అభివృద్ధి చెందాలంటే భాజపాకు పాలనపగ్గాలు అందించాలని ఓటర్లను అభ్యర్థించారు.

ఇదీ చూడండి : జాతీయ రహదారిపై ప్రమాదం... వాహన రాకపోకలకు అంతరాయం