ప్రజల్లో చైతన్యానికి రోడ్డు భద్రతా వారోత్సవాలు...

వాహనం నడిపేటపుడు జాగ్రత్తలు తీసుకోకపోతే ప్రమాదాల బారిన పడే అవకాశం ఉంది.  రోడ్డు ప్రమాదాల్లో రాష్ట్రంలో ఏటా వేలమంది ప్రాణాలు కోల్పోతున్నారు. అలాంటి ప్రమాదాల నివారణకు భద్రతా వారోత్సవాల పేరిట పోలీసులు అవగాహన కల్పిస్తున్నారు.

ప్రమాదాల పట్ల ప్రజల్లో అవగాహన కల్పిస్తూ చైతన్య పరిచేందుకే రోడ్డు భద్రతా వారోత్సవాలు నిర్వహిస్తున్నట్లు ట్రాఫిక్​ పోలీసులు పేర్కొన్నారు. మేడ్చల్​ జిల్లా ఈసీఐఎల్​ చౌరస్తాలో కుషాయిగూడ ట్రాఫిక్​ సీఐ స్వామి ఆధ్వర్యంలో రెండో రోజు వారోత్సవాలను ఘనంగా నిర్వహించారు. కార్యక్రమంలో సిబ్బందితో కలిసి వాహనాలు నడిపేటపుడు జాగ్రత్తల గురించి వివరించే పుస్తకాన్ని వాహనదారులకు బహూకరించారు. రోజాపూలు ఇచ్చి ప్రతి ఒక్కరూ శిరస్త్రాణం ధరించాలని సూచించారు.

రాష్ట్రాన్ని ప్రమాద రహితంగా చూడాలనేదే తమ ఆకాంక్ష అని ట్రాఫిక్​ సీఐ స్వామి పేర్కొన్నారు. చిన్న చిన్న జాగ్రత్తలు తీసుకోకపోవడం వల్ల పెద్ద మూల్యం చెల్లించుకోవాల్సి వస్తుందని అభిప్రాయపడ్డారు. ప్రతి ఒక్కరూ ట్రాఫిక్​ నియమాలు పాటించి పోలీసులకు సహకరించాలని కోరారు.