బైకు అదుపుతప్పి డివైడర్​ను ఢీకొని వ్యక్తి మృతి

మేడ్చల్​ మల్కాజిగిరి జిల్లా గోపాలపురం పోలీస్​స్టేషన్​ పరిధిలో వేగంగా దూసుకొచ్చిన ఓ బైకు అదుపుతప్పి డివైడర్​ను ఢీకొనగా ఓ వ్యక్తి మరణించాడు. పోలీసులు ఘటనాస్థలానికి చేరుకుని కేసును దర్యాప్తు చేస్తున్నారు.

వేగంగా దూసుకొచ్చిన ద్విచక్రవాహనం అదుపుతప్పి ఫ్లైఓవర్​ డివైడర్​ను ఢీకొనగా ఓ వ్యక్తి మృతి చెందిన ఘటన మేడ్చల్​ మల్కాజిగిరి జిల్లా గోపాలపురం పోలీస్​స్టేషన్​ పరిధిలో చోటుచేసుకుంది. మారేడుపల్లికి చెందిన కిరణ్​కుమార్... రైట్ క్లిక్ టెక్నాలజీస్​లో మేనేజర్​గా విధులు నిర్వహిస్తున్నారు. మంగళవారం రాత్రి విధులు పూర్తి చేసుకుని ఇంటికి వెళ్తున్నప్పుడు అతను నడుపుతున్న బైకు అదుపుతప్పి డివైడర్​ను ఢీకొంది. ఘటనలో కిరణ్​ తలకు తీవ్రగాయాలై అతను అక్కడికక్కడే మరణించాడు.

సమాచారమందిన పోలీసులు వెంటనే ఘటనాస్థలానికి చేరుకుని మృతదేహాన్ని పోస్టుమార్టం నిమిత్తం గాంధీ ఆసుపత్రికి తరలించారు. అతని మరణంతో మారేడుపల్లిలోని కిరణ్​ నివాసం వద్ద విషాదఛాయలు అలుముకున్నాయి. ప్రమాదానికి అతివేగమే కారణమా అనే కోణంలో పోలీసులు దర్యాప్తు చేస్తున్నారు.