మేడ్చల్-మల్కాజిగిరి జిల్లా వ్యాప్తంగా కొనసాగుతున్న జనతా కర్ఫ్యూ

కరోనా మహమ్మారిని నివారించేందుకు కేంద్ర, రాష్ట్ర ప్రభుత్వాలు తీసుకుంటున్న చర్యలకు మేడ్చల్-మల్కాజిగిరి జిల్లాలో ప్రజలంతా సహకరిస్తున్నారు. తమ తమ ఇళ్లకే పరిమితమవుతూ.. కరోనా కట్టడిలో తమ వంతు బాధ్యతను నిర్వర్తిస్తున్నారు.

కరోనాను నివారించేందుకు ప్రధానమంత్రి నరేంద్ర మోదీ ఇచ్చిన జనతా కర్ఫ్యూ మేడ్చల్-మల్కాజిగిరి జిల్లాలో ప్రశాంతంగా కొనసాగుతోంది. ప్రజలంతా స్వచ్ఛందంగా తమ వ్యాపార, వాణిజ్య సముదాయాలను మూసి వేసి.. ఇళ్లలోనే ఉంటున్నారు. ఆర్టీసీ బస్సులన్నీ డిపోలకే పరిమితం అయ్యాయి. సూపర్ మార్కెట్లు, పెట్రోల్ బంకులూ మూతబడ్డాయి.

నిత్యం రద్దీగా ఉండే హైదరాబాద్-వరంగల్ జాతీయ రహదారి, ఉప్పల్, ఘట్​కేసర్, రామంతాపూర్, మేడిపల్లి, బోడుప్పల్​లోని రోడ్లన్నీ ప్రయాణికులు లేక బోసిపోయాయి.

కూకట్​పల్లిలో..

కూకట్​పల్లిలోనూ జనతా కర్ఫ్యూ విజయవంతంగా కొనసాగుతోంది. ప్రజలంతా స్వచ్ఛందంగా కర్ఫ్యూలో పాల్గొంటున్నారు. ఎవరూ రోడ్లపైకి రాకుండా ఇళ్లలోనే గడుపుతున్నారు. కూకట్​పల్లిలోని జేఎన్టీయూహెచ్ సర్కిల్, మూసాపేట్, హైటెక్ సిటీ రహదారి తదితర ప్రాంతాలు నిర్మానుష్యంగా దర్శనమిస్తున్నాయి.

మల్కాజిగిరిలోనూ..

మల్కాజిగిరి, కుషాయిగూడ, కీసరలోనూ జనతా కర్ఫ్యూ కొనసాగుతోంది. ప్రజలంతా స్వచ్ఛందంగా కర్ఫ్యూలో పాల్గొంటున్నారు. నిత్యం వేలాది మందితో కిటకిటలాడే కుషాయిగూడ బ​స్టాండ్, కూరగాయల మార్కెట్లు బోసిపోయాయి. ఇళ్ల నుంచి ప్రజలు బయటకు రాకుండా పోలీసులు అవగాహన కల్పిస్తున్నారు.

జీడిమెట్లలో..

కరోనాను నివారించేందుకు జీడిమెట్లలో ప్రజలంతా తమ తమ ఇళ్లకే పరిమితమవుతున్నారు. వైరస్​ను అరికట్టేందుకు తమ వంతు బాధ్యతగా ముందస్తుగా చర్యలు తీసుకుంటున్నారు. దుకాణదారులు స్వచ్ఛందంగా బంద్ పాటిస్తున్నారు. బస్సులన్నీ డిపోలకే పరిమితం అవుతున్నాయి. అత్యవసర పరిస్థితుల్లో ఉపయోగించడానికి మాత్రం 5 బస్సులను అందుబాటులో ఉంచారు.

ఇదీ చూడండి:గుడ్లు, చికెన్‌తో కరోనా వ్యాపించదు..అవన్నీ అపోహాలే!