Cyber Crime Compliant: 'క్షణాల్లో సమస్య పరిష్కరిస్తామని.. లక్షల్లో కాజేశారు'

Today Cyber Crime News: ఓ వ్యక్తి ఇటీవల 6 నెలల ఈఎంఐ ఆప్షన్​తో ఆన్​లైన్​లో ఫోన్​ కొన్నాడు. కానీ తొమ్మిది నెలలు ఈఎంఐ కట్టాలని సందేశం రావడంతో ఆందోళన చెందాడు. కస్టమర్​కేర్​ను సంప్రదించాలని గూగుల్​లో వెతికాడు. చివరకి అతనికి ఒక నెంబర్​ కనిపించింది. వెంటనే దానికి కాల్​ చేయగా.. క్షణాల్లో సమస్య పరిష్కరిస్తామని.. రూ. 1,25,700 మాయం చేశారు.

Today Cyber Crime News: మేడ్చల్ జిల్లాలోని జీడిమెట్ల పరిధిలో సయ్యద్ భాషా కుటుంబంతో కలిసి నివాసముంటున్నాడు. ఓ ప్రైవేటు సంస్థలో అటెండర్​గా విధులు నిర్వహిస్తున్నాడు. ఇటీవలే సయ్యద్ ఆరునెలల ఈఎంఐ పద్ధతిలో ఓ ఫోన్ కోనుగోలు చేశాడు. కానీ అతనికి 9నెలల పాటు ఈఎంఐ కట్టాలని సందేశం వచ్చింది.

యాప్​ను ఇన్​స్టాల్​ చేయమని..

దాని గురించి తెలుసుకునేందుకు క్రెడిట్ కార్డు వినియోగదారుల సేవా కేంద్రం నెంబర్ కోసం అంతర్జాలంలో అన్వేషించాడు. చివరకు ఓ వెబ్​సైట్​లో వచ్చిన ఫోన్​ నెంబర్​కు ఫోన్​ చేశాడు. అతను ఎదుర్కొంటున్న సమస్యను వారికి వివరించాడు. మీ సమస్యను క్షణాల్లో పరిష్కరిస్తామని అక్కడి నుంచి బదులు వచ్చింది. దీని కోసం కొన్ని సూచనలు పాటించాలని సయ్యద్​కు తెలిపారు. దానికి ఇతను అంగీకరించడంతో ఫోన్​లో క్విక్​ సపోర్ట్​ యాప్​ను ఇన్​స్టాల్​ చేయించారు. దాని ఆధారంగా సయ్యద్​ ఫోన్​ను వారి ఆధీనంలోకి తీసుకున్నారు. వెంటనే సయ్యద్ ఎస్బీఐ బ్యాంకు ఖాతా, క్రెడిట్​ కార్డు, ఐసీఐసీఐ బ్యాంకు ఖాతాల నుంచి పలు దఫాలుగా రూ. 1,25,700 నగదు బదిలీ అయినట్లు గుర్తించాడు. మోసపోయినట్లు గ్రహించిన బాధితుడు జీడిమెట్ల పోలీసులను ఆశ్రయించాడు. పోలీసులు కేసు నమోదు చేసుకుని దర్యాప్తు చేస్తున్నట్లు ఇన్​స్పెక్టర్ బాలరాజు వెల్లడించారు.

ప్రజలు అంతర్జాలంలో ఇలాంటి విషయాల గురించి వెతికే సమయంలో జాగ్రత్తలు పాటించాలని పోలీసులు సూచిస్తున్నారు. ఎవరైనా యాప్​లు డౌన్​లోడ్​ చేయమని.. లింక్​ క్లిక్ చేయమని.. కార్డు వివరాలు తెలపమంటే అప్రమత్తంగా ఉండాలని హెచ్చరిస్తున్నారు.

ఇదీ చూడండి: Cyberabad CP: 'బ్యాంకు అధికారులమని.. రూ.3కోట్లు దోచేశారు'