బాలమిత్ర పోలీస్​స్టేషన్​ను​ ప్రారంభించిన సీపీ మహేశ్​ భగవత్​

మేడ్చల్​ జిల్లాలో మేడిపల్లిలో బాలమిత్ర పోలీస్​స్టేషన్​ను రాచకొండ సీపీ మహేశ్​ భగవత్​ ప్రారంభించారు.

పోలీసులను చూస్తేనే పిల్లలు ఆమడదూరం పారిపోతారు. ఇంకా వారితో మాట్లాడాలంటే.. ఫిర్యాదు చేయాలంటే అంతే సంగతులు. చాలా మంది పోలీసులకు సైతం పిల్లలతో ఎలా మెలగాలో తెలియదు. బాలలే బాధితులైతే వారితో ఎలా వ్యవహరించాలో అవగాహన లేదు.. ఇలాంటి సమస్యలకు చెక్​ పెట్టేందుకు రాచకొండ పోలీసులు అడుగులు ముందుకేశారు. నోబెల్​ బహుమతి గ్రహీత కైలాష్​ సత్యార్థికి చెందిన బచ్​పన్​ బచావో స్వచ్ఛంద సంస్థతో కలిసి మేడ్చల్​ జిల్లాలో మేడిపల్లి ఠాణాను తీర్చిదిద్దారు. బాలల దినోత్సవం సందర్భంగా రాచకొండ సీపీ మహేశ్​ భగవత్​ ప్రారంభించారు.

ఠాణాలో ప్రత్యేకంగా ఓ గదిని బాలమిత్ర పోలీస్​స్టేషన్​కు కేటాయించారు. కార్టూన్​లు, వివిధ రకాల పెయింటింగ్​తో గదిని అలంకరించారు. పిల్లలతో ఎలా వ్యవహరించాలనే అంశంపై ఇద్దరు కానిస్టేబుళ్లకు ప్రత్యేక శిక్షణ ఇచ్చారు. ఏదైనా కేసులో మైనర్లు బాధితులుగా ఉంటే వారిని ఈ స్టేషన్​కు తీసుకొచ్చి సమాచారం సేకరిస్తారు.

ఇవీచూడండి: 'పుస్తకాలు చదవాల్సిన అవసరం చాలా ఉంది'