YS Sharmila: మెదక్ జిల్లాలో ధాన్యం కొనుగోళ్లలో జరుగుతున్న అక్రమాలు బయట పెట్టడానికి ఇక్కడికి వచ్చానని వైతెపా అధ్యక్షురాలు షర్మిల అన్నారు. వరివేయద్దన్న సీఎం ప్రకటన వల్ల నష్టపోయిన రైతులకు తెరాస ఖాతాలో ఉన్న డబ్బుల నుంచి పరిహారం చెల్లించాలని ఆమె డిమాండ్‌ చేశారు. జిల్లా కేంద్రంలోని వ్యవసాయ మార్కెట్ను సందర్శించారు. రైతుల సమస్యలను అడిగి తెలుసుకున్నారు.
గత 20 రోజులుగా రైతులు ఇక్కడే ఉన్న ఏ అధికారి వారిని పట్టించుకున్న పాపాన పోలేదని వైఎస్ షర్మిల ఆరోపించారు. ఈరోజు తాను వస్తున్నానని తెలిసి అధికారులు విధులకు హాజరు కాలేదన్నారు. జిల్లాలో ప్రతి కిలోమీటర్కు ఒక కల్లం ఉంది..కల్లం నిండా వడ్లు ఉన్నాయని... వాటిని కొనే నాథుడు లేడని ఆమె విమర్శించారు.
రాష్ట్ర ప్రభుత్వం దిల్లీకి వెళ్లి కేంద్రం మెడలు వంచి ధాన్యం కొనుగోళ్లు చేయిస్తాని వచ్చి... ఓటమిని ఒప్పుకొని తామే కొంటామని చెప్పారని షర్మిల తెలిపారు. ఈ మాట చెప్పి ఇప్పటికే నెలరోజులు అయ్యిందని అన్నారు. ఎన్నికల మేనిఫెస్టోలో ఇచ్చిన హామీల మాదిరిగానే ఇది కూడా అబద్దమేనా అని ప్రశ్నించారు.