Road Accident at Kolcharam : ఒకే జిల్లాలోని వేరు వేరు ఘటనలో నలుగురు వ్యక్తులు మృతి చెందారు. పెళ్లిలో ఆనందంగా గడిపి.. తిరిగి ఇంటికి వెళ్తున్న ఓ కుటుంబానికి విషాదం ఎదురైంది. వారు ప్రయాణిస్తున్న కారు, ఆర్టీసీ బస్సును ఢీ కొట్టడంతో ప్రమాదం జరిగింది. ఈ ఘటనలో ఇద్దరు వ్యక్తులు అక్కడిక్కడే మృతి చెందారు. మరో నలుగురికి తీవ్ర గాయాలయ్యాయి. వేరే చోట ట్రాక్టర్ని డ్రైవ్ చేసుకుంటు వెళ్తున్న వ్యక్తి ఆ ట్రాక్టర్ కింద పడి మరణించాడు. మరో చోట ఇంకో వ్యక్తి డీసీఎం టైర్ కింద పడి మృతి చెందాడు. ఈ ప్రమాదాలన్ని మెదక్ జిల్లాలో జరిగాయి.
బంధువులు, పోలీసులు తెలిపిన వివరాల ప్రకారం : మెదక్ జిల్లాలోని పాపన్నపేట మండలం ఎల్లాపూర్ గ్రామానికి చెందిన నాగరాజు(32), అతని కుటుంబంతో సహా హత్నూ మండలం దోల్తాబాద్లో బంధువుల విహహానికి వెళ్లారు. పెళ్లి అనంతరం కారులో తిరిగి వస్తున్న క్రమంలో.. కొల్చారం మండలంలోని జైన మందిర్ వద్ద హైదరాబాద్కి వెళ్తున్న ఆర్టీసీ బస్సును ఢీ కొట్టింది. ఈ కారును డ్రైవ్ చేస్తున్న నాగరాజు, తన అన్న కుమార్తె హర్షిత(9 నెలలు) అక్కడికక్కడే మృతి చెందారు. మృతుడు అన్న దుర్గగౌడ్, అతని భార్య లావణ్య పరిస్థితి విషమంగా ఉంది. కుమారుడు చోటు, రామమ్మకు గాయాలు అయ్యాయి. రోడ్డు ప్రమాదం విషయం స్థానికులు ద్వారా తెలుసుకున్న పోలీసులు ఘటనా స్థలానికి చేరుకుని.. గాయపడిన వారిని హైదరాబాద్లోని ఓ ప్రవేట్ ఆసుపత్రికి తరలించారు. మృత దేహాలను మెదక్ ప్రభుత్వ ఆసుపత్రికి తరలించారు. కుటుంబ సభ్యుల పిర్యాదు మేరకు కేసు నమోదు చేసుకున్నట్లు స్థానిక సీఐ విజయ్ తెలిపారు. ఆర్టీసీ డ్రైవర్ పరారీలో ఉన్నాడని పోలీసులు వెల్లడించారు.